Sa pag-abli sa ikaduhang semestre niining Enero-Pebrero, gilunsad sa mga estudyante ang mga protesta ug aktibidad sa dili moubos sa 11 ka unibersidad. Gatusan ang nagtapok aron padayon nga ipakigbisog ang ilang demokratikong katungod, singilon ang rehimeng Marcos sa malukpanong korapsyon ug suklan ang pagpanumpo.

Sa University of the Philippines (UP) System, gilunsad ang mga protesta sa 10 ka kampus niini. Pinakatataw dinhi ang pagmartsa sa kapin 550 ka estudyante sa UP Los Baños sa Laguna niadtong Enero 19.

Aduna usay mga protesta sa Polytechnic University of the Philippines, Technological University of the Philippines-Manila, Far Eastern University, University of Santo Tomas, De La Salle University, Ateneo de Manila University, National Teachers’ College, Saint Louis University sa Baguio City, Cavite State University ug sa University of San Carlos sa Cebu City.

Pagbarog kontra TOFI. Tataw sa mga protesta ang pagsupak sa mga sugyot nga pagpataas sa matrikula (tuition and other fee increase o TOFI) sa mga pribadong unibersidad. Ginahimong rason sa mga unibersidad ang nagkataas nga gasto sa edukasyon, pagpalambo sa mga pasilidad, ug mas taas nga sweldo alang sa mga magtutudlo ug empleyado. Lambigit niini, naglunsad ang National Union of Students of the Philippines (NUSP) og 5 ka puntong demanda batok sa TOFI.

Gidayeg usab sa NUSP ang mga estudyante sa University of the East ug DLSU human sa anunsyo sa administrasyon sa duha ka unibersidad ning bag-o nga dili kini magpatuman og TOFI sa akademikong tuig sa 2026-2027. Resulta kini sa petisyon, dayalogo, protesta ug kolektibong protesta sa mga estudyante, konseho sa mga estudyante ug mga progresibong grupo.