Niadtong Enero 21, giduso sa Department of Information and Communications Technology (DICT) ang usa ka sugyot nga palisiya aron himuong rekisito ang pagparehistro sa mga Pilipino sa pag-abli og akawnt asamang plataporma sa social media. Ilalum sa balaodnon, himuong rekisito ang paghatag og tinuod nga pangalan ug uban pang datos aron magamit ang kaugalingong akawnt. Alang sa mga edad 18 paubos, gikinahanglan ang ginikanan para sa beripikasyon.

Pagaobligahon usab ang mga platform nga magpatuman og hugot nga beripikasyon sa identidad, lakip ang pagkuha og piktyur sa nawong sa mga nagagamit niini. Kini aron daw batukan ang mga krimen online sama sa mga scam, pagkawat sa identidad, ug sekswal nga pag-abuso ug pagpahimulos sa mga bata. Ang maong palisiya kasamtangan nang ginapatuman sa European Union ug ginaduso nga mapatuman sa tibuok Southeast Asia. Unang gisugyot ni Sen. Panfilo Lacson ang maong palisiya niadtong Hulyo 2025.

Matud sa mga grupong Agham ug Computer Professionals’ Union, bisan og lehitimo ang mga isyung gisulti sa DICT, dayag nga ginalapas sa palisiya ang pribasiya sa mga nagagamit sa social media. Ginapasa sa ahensya ang responsibilidad sa pagpukan sa mga krimen online sa ordinaryong Pilipino imbes nga panubagon ang mga kumpanyang nanag-iya sa mga social media platform. Ginahimo usab niining normal ang sarbeylans ug pagpangulekta sa pribadong impormasyon sa mga indibidwal.

Tataw nga kabahin kini sa nagkagrabeng sarbeylans, sensura ug pagsumpo sa rehimeng US-Marcos sa katungod sa gawasnong pagpadayag ug pagpamahayag sa katawhan. Kini walay kalainan sa kanhi nang palpak nga mga balaod sama sa SIM Registration Law ug Cybercrime Prevention Act nga nagbutang sa mga sensitibong datos sa katawhan sa kamot sa mapanumpuong ahensya sa estado ug pribadong kumpanya. Wala niini napahunong ang mga krimen online, nga nagpadayon ug labaw pang migrabe.

Paggamit sa social media alang sa pasismo

Niadtong Disyembre 2025 ug Enero niining tuiga, dayag ang pagdaghan sa mga komento sa social media nga nagpakita sa kasuko sa katawhan batok sa korapsyon ug pasismo sa rehimeng US-Marcos. Sa hilabihang kasuko ug pagkadismaya, daghan ang nagpadayag sa kahusto sa armadong pagsukol nga ginaasdang sa Partido Komunista ng Pilipinas ug Bagong Hukbong Bayan. Naatol ang pagdaghan sa mga komento sa anibersaryo sa Partido, diin adunay mga post sa pamahayag, litrato ug bidyo mahitungod sa selebrasyon. Kadaghanan sa mga komento pagpadayag sa ilang pagkadismaya sa nagtunhay nga dunot nga sistema ug kagustuhang magrebolusyon aron bag-ohon kini.

Aron pugngan ang pagbwelo sa mga komento, gihulga sa Armed Forces of the Philippines (AFP) ang mga nagpadayag sa ilang reklamo ug giakusahang “nagsulsol nga mag-alsa batok sa gubyerno.” Gipakaminus sa NTF-Elcac ang mga reklamo isip “propaganda” ug ginapagawas nga usa lamang kini ka “malukpanong kampanya sa social media” sa Partido. Tungod sa kahadlok sa ahensya ug sa AFP sa nagkalapad nga disgusto sa katawhan sa rehimeng Marcos, naglunsad kini og kampanyang “dumog” gamit ang ahensyang pang-“PR” (public relations) ug mga bayarang troll. Lakip sa gipalihok sa NTF-Elcac ang liboan ka mga sundalo sa AFP aron lunuron sa insulto o paghimaraot sa kinsamang adunay komentong kritikal o nagasaway sa rehimen ug ilabina batok sa pagpangabuso sa militar. Dayag usab nilang gitabunan og fake news ang mga balita mahitungod sa paglapas sa tawhanong katungod ug ginakontrol ang opinyong publiko pinaagi sa sensura sa midya.

Nakagambalay sa NAP-UPD

Ang online nga kampanyang dumog, paggrabe sa sarbeylans, pagtarget sa mga kritiko sa estado ug mga balaodnon alang dinhi nakapailalum sa gambalay sa National Action Plan for Unity, Peace, and Development (NAP-UPD). Ilalum sa Strategic Communication Cluster niini, laraw sa NTF-Elcac nga pugngan ug kontrolon ang mga daluyan sa impormasyon, pugngan ang rekrutment ug kontrahon ang “propaganda” sa rebolusyonaryong kalihukan sulod ug gawas sa nasud pinaagi sa pagpakaylap og disimpormasyon, saywar ug Red-tagging. Ginapakaylap sa ahensya ang panghunahuna nga ang tanang pagkontra sa korapsyon ug pagpanumpo kabahin sa propaganda sa rebolusyonaryong kalihukan, samtang ang mga protesta sa mga kabatan-onan batok sa korapsyon kuno “terror grooming” aron ipangatarungan ang pagsumpo sa demokratikong katungod alang sa gawasnong pagpadayag ug pag-organisa.

Kung maaprubahan ang pugos nga pagparehistro sa social media, dili lamang madugangan ang nakulektang pribadong impormasyon ug mga panlantaw, labaw pa niining himuong sistematiko ang malukpanong sarbeylans sa estado. Sama sa naunang mga balaod, sigurado nga mamahimong palpak ang balaod sa tinguhang sumpuon ang krimen online. Sama sa naunang pugos nga pagparehistro sa SIM Card, sigurado usab nga minilyong Pilipino ang mawad-an og akses sa mahinungdanong serbisyo sa komunikasyon ug mahikawan og tingog. Mahimong mas dali para sa estado nga kontrolon ang opinyon ug balita, ug pagtarget niini sa mga kritiko.