Naglunsad og nasudnong welga ang katawhan sa US isip protesta sa nagkagrabeng walay puas nga pasismo sa mga ahente sa Immigration and Customs Enforcement (ICE) ug Customs and Border Patrol (CBP) niadtong Enero 30. Gitawag ang protesta na “National Shutdown: No Work. No School. No Shopping. Stop Funding ICE.”

Nahitabo ang 300 ka lihok protesta ug welga sa 50 ka estado, nga gipasiugdahan sa kapin 1,000 ka organisasyon. Lakip sa nag-organisa sa protesta ang mga grupo sa mga Pilipino sama sa Anakbayan, Malaya Movement, League of Filipino Students, Defend Migrants Alliance ug Migrante USA. Tataw dinhi ang pag-walk-out sa liboan ka estudyante sa hayskul ug kolehiyo gikan sa nagkalain-laing syudad. Liboan ka negosyo ang temporaryong nagsirado ug nagpadayag og suporta sa welga.

Gilunsad ang welga taliwala sa nagkagrabeng kabangis sa Minnesota. Anaa sa 3,000 ka ahente gikan sa Department of Homeland Security ang gideploy ilalum sa Operation Metro Surge, aron gukdon ang mga imigrante ug magsabwag og teror sa katawhan. Misangko ang kabangis sa pagpatay sa ahente sa ICE kang Renee Good, usa ka manunulat, niadtong Enero 7. Gisundan kini sa pagpatay sa mga ahente sa CBP kang Alex Pretti, usa ka nars, niadtong Enero 24. Gawas sa duha, gipatay usab ng mga ahente sa ICE silang Keith Porter, usa ka US citizen ug Silverio Villegas González, usa ka imigrante gikan Mexico.

Sa Minnesota gilunsad ang unang hugna sa pangkinatibuk-ang welga niadtong Enero 23. Mikabat sa 50,000 ang misalmot sa protesta ug kapin 700 negosyo ang nagsirado sa maong adlaw. Anaa sa 80,000 ka mamumuo gikan sa Minneapolis Regional Labor Federation ang misuporta sa protesta.

Sukad nga milingkod sa pwesto si Trump, kapin 30 ang namatay samtang nakadetine sa mga pasilidad sa ICE. Sagad nga hinungdan sa pagkamatay mao ang pagpasagad sa panglawas sa mga gibalhog sa prisohan.