Gipaimbestigahan sa mga Pilipinong migrante ang nadiskubreng klase-klaseng ghost project o dili tinuod nga proyekto sa Department of Migrant Workers (DMW) ug Department of Foreign Affairs (DFA) sa US ug Taiwan.

Matud sa DMW, naggahin kini og ₱5 milyon kada tuig alang sa mga shelter o temporaryong silungan sa mga migrante nga ginadumalahan sa mga non-governmental organization ug sa ahensya sa Taiwan. Apan matud ni Father Joy Tajonera, usa ka Pilipino-Amerikanong misyonerong pari ug nagadumala sa shelter nga Bahay Ugnayan, wala na kini nakadawat og subsidyo gikan sa Manila Economic and Cultural Office sukad 2022.

Nadiskubre usab sa pari nga naggahin ang ahensya og ₱2.9 milyon para sa “MWO shelter” sa Taipei nga sa kasamtangan nakasira.

Sa US, gikundena sa Bagong Alyansang Makabayan-USA Washington ang ghost project sa DFA nga Philippine Consulate sa Washington DC. Taliwala sa nakagahing pondong ₱83.73 milyon alang sa 2025 ug ₱88.9 milyon alang sa 2026 wala pa gihapon makita sa mga Pilipino sa US kung asa na kini. Walay report kung unsa ang nahitabo sa pondo. Gikwestyon usab sa grupo kung asa napadulong ang pondo alang sa Assistance to Nationals sa DFA nga nagkantidad og ₱9.8 bilyon alang sa 2025. Halos walay ginahatag nga serbisyo ang ahensya sa mga Pilipinong nanginahanglan, ilabina sa mga Pilipinong gidetine sa Immigration and Customs Enforcement.