Lapnagon nga ginkundenar sang mga grupo sang mamalitha sa sulod kag guwa sang pungsod, subongman sang mga tawong-simbahan, akademiko kag mga grupong progresibo ang pamatbat nga may kasal-anan sanday Frenchie Mae Cumpio kag Marielle Domequil sa kaso nga “terror financing.” Ginpamatbatan ang duha sadtong Enero 22 sang tubtob sa 18 ka tuig nga pagkabilanggo. Ginapamulta man sila sang ₱500,000 kada isa.

Tigdumala si Cumpio sa independyenteng media outlet nga Eastern Vista kag kontribyutor sang Altermidya, samtang si Domequil istap sang Rural Missionaries of the Philippines. Gin-aresto sila, kaupod ang tatlo pa sadtong Pebrero 7, 2020. Kolektibo sila nga ginakilala bilang Tacloban 5.

Ginkakibot sang madamo ang pamatbat, ilabi na nga sadtong Oktobre 2025, gindeklarar sang Court of Appeals nga wala sang basehan ang pagkuha sang estado sang kwarta nga nakuha sa kay Cumpio. Suno sa korte, wala sang ligal ukon aktwal nga basehan para masiling nga may angot ang kwarta sa Partido Komunista sang Pilipinas kag Bagong Hukbong Bayan. Samtang, gin-abswelto naman sanday Cumpio kag Domequil sa separado nga kaso nga illegal possession of firearms and explosives.

Gintawag sang mga mamalitha ang pamatbat nanday Cumpio kag Domequil bilang “kapaslawan sang hustisya” kag seryoso nga peligro sa sadto na makaluluoy nga kahimtangan sang kahilwayan sa pagpahayag kag pagbantala sa Pilipinas. Ginbatikos nila ang paggamit sang estado sang layi kontra-terorismo agud pahipuson ang mga mamalitha kag iban pa nga boses sang pagpamatuk. Magluwas nanday Cumpio kag Domequil, indi magnubo sa 35 pa ka indibidwal ang ginkasuhan sang “terror financing” halin 2021.

Nagakahangawa man ang mga internasyunal nga organisasyon sang mamalitha sa suno sa ila pinaka-una nga pamatbat sa isa ka mamalitha sa kaso sang “terror financing.” Indi magnubo sa 14 ka dumuluong nga emabahada sa Pilipinas ang nagpanawagan nga gilayon hilwayon sanday Cumpio kag Domequil.

Antes kag sa adlaw sang pagpamatbat, naglunsar sang protesta ang mga progresibong organisasyon sa Tacloban City kag Metro Manila. Sadtong Enero 22, ginatos ang nagtipon sa atubang sang Commission on Human Rights agud pamatukan ang indi makatarungan nga pamatbat kag igiit ang gilayon nga paghilway sa Tacloban 5.