Pakigbisog para sa CBA sa mga superbisor sa PLDT. Sunud-sunod nga protesta ang gilunsad sa mga superbisor sa PLDT Inc niining Enero. Panawagan nila ang pagkab-ot og usa ka makahuluganong collective bargaining agreement (CBA) alang sa 2026-2028 tali sa Gabay ng Unyon sa Telekomunikasyon ng mga Superbisor sa PLDT (GUTS-PLDT) ug liderato sa PLDT Inc. Nagsugod ang negosasyon sa mga representante sa GUTS ug liderato sa PLDT alang sa bag-ong CBA niadtong Nobyembre 28, 2025 apan human ang 16 ka beses nga negosasyon wala pay makahuluganong nauyunan.

25 ka tuig nga isyu sa iligal nga pagpanangtang sa Toyota. Nagpiket ang Toyota Motor Philippines Corporation Workers’ Association sa upisina sa Department of Labor and Employment (DOLE) sa Intramuros, Maynila niadtong Enero 26. Giduso nila sa ahensya nga tubagon na ang 25 ka tuig nga isyu sa iligal nga pagpanangtang ug ang padayon nga paghikaw sa katungod sa kolektibong negosasyon. Niadtong 2001, kapin 230 ka mamumuo nga myembro sa unyon ang iligal nga gitangtang sa Toyota human sa pagduso sa unyon sa negosasyon alang sa CBA ug welga sa mga mamumuo.

Pagbatikos sa langan nga aksyon sa NLRC Region 3. Nagpiket ang mga myembro sa National Federation of Labor Unions-Kilusang Mayo Uno atubangan sa National Labor Relations Commission Region 3 sa San Fernando, Pampanga niadtong Enero 21. Gimakmak nila ang ahensya sa mga kontra-mamumuong desisyon nga gipagawas niini sa miagi ug ang kalangan sa pag-aksyon sa uban pang kasong gipasaka sa mga mamumuo.

Panawagan alang sa umento sa suhulan sa Calabarzon. Nagprotesta ang mga mamumuo sa Southern Tagalog sa upisina sa Regional Tripartite Wages and Productivity Board IV-A sa Calamba, Laguna niadtong Enero 26. Girehistro nila ang panawagan alang sa dugang nga suhulan sa tibuok nasud nga sarang ug makabuhi sa usa ka pamilya. Gimakmak nila ang ahensya sa paghatag og sinsilyong umento sa suhulan sa miagi.