Hugot nga gikundena sa rehiyonal nga komite sa International League of Peoples’ Struggle (ILPS) sa Europe ang nagkagrabeng atake batok sa katawhan sa Rojava nga nagsugod niadtong ulahing mga semana sa Enero. Ginahulagway sa ILPS ang gakahitabong opensiba isip “nagkagrabe ug nagkakusog nga kampanya sa kabangis, pagpalayas ug kolektibong pagsilot” nga walay pagtahod sa kinabuhi sa mga sibilyan ug batakang dignidad sa mga tawo. Pahimangno niini, gikabalak-an ang malukpanong masaker sa katawhang Kurdish.

Sa pamahayag niini, gihatagag duut sa ILPS Europe nga ang mga pag-atake sa Rojava nakasubay sa mga laraw sa pulitika ug militar sa mga gamhanang estado sa rehiyon ug sa ilang imperyalistang amo. Gilambigit sa grupo ang opensiba sa mas lapad nga estratehiya sa kooperasyong US-Zionista-Turkish nga nakapukos sa paghari sa West Asia.

Hugot nga gimakmak sa ILPS Europe ang mga gubyerno sa Europe sa pakigkunsaba sa opensiba pinaagi sa pagpondo ug pagsuporta sa rehimen ug mga armadong grupong nalambigit sa pag-atake ug pagmasaker sa katawhang Kurdish.