Nasaknap a kinundenar dagiti grupo ti peryodista iti uneg ken ruar ti pagilyan, kasta met dagiti tao’t simbaan, akademiko ken dagiti grupo a progresibo ti husga a nagbasol da Frenchie Mae Cumpio ken Marielle Domequil iti kaso a “terror financing.” Nakedngan ti dua idi Enero 22 ti agingga 18 tawen a pannakaibalud. Pinagmulta da met ti ₱500,000 tunggal maysa.

Ni Cumpio ket mangimaton iti independyente a media outlet nga Eastern Vista ken kontribyutor ti Altermidya, bayat a ni Domequil ket istap ti Rural Missionaries of the Philippines. Isuda ket naaresto, karaman ti tallo pay idi Pebrero 7, 2020. Kolektibo a nabigbig isuda kas Tacloban 5.

Ti husga ket nakakigtotan ti adu, nangruna ta idi Oktubre 2025, indeklara ti Court of Appeals nga awanan basaran ti panangsamsam ti estado iti kwarta a naala babaen ken Cumpio. Segun iti korte, awan ti ligal wenno aktwal a basaran tapno makuna nga addaan kainaigan ti pinansya iti Communist Party of the Philippines ken New People’s Army. Kabayatanna, abswelto met da Cumpio ken Domequil iti nagsina a kaso nga illegal possession of firearms and explosives.

Ti husga kada Cumpio ken Domequil ket inawagan dagiti peryodista kas “pannakapaay ti hustisya” ken seryoso a pangta iti siguden a nakaam-ames a kasasaad ti wayawaya iti panagipablaak ken panagiyebkas iti Pilipinas. Binatikos da ti panagaramat ti estado iti linteg a kontra-terorismo tapno paulimeken dagiti peryodista ken dadduma pay a boses ti panagsupyat. Malaksid kada Cumpio ken Domequil, saan a bumaba iti 35 pay nga indibidwal ti nakasuan ti “terror financing” manipud 2021.

Agdandanag met dagiti internasyunal nga organisasyon ti peryodista iti kunada nga kaunaan a husga iti maysa a peryodista iti kaso a “terror financing.” Saan a bumaba iti 14 a gangannaet nga embahada iti Pilipinas ti immawag a dagus a wayawayaan da Cumpio ken Domequil.

Sakbay ken iti aldaw ti panaghusga, nagisayangkat ti protesta dagiti progresibo nga organisasyon idiay Tacloban City ken Metro Manila. Idi Enero 22, ginasut ti nagtitipon iti sango ti Commission on Human Rights tapno supyaten ti saan nga nainkalintegan a husga ken irupir ti kadagusan a panangwayawaya iti Tacloban 5.