Yuta sa Hacienda Luisita, iapud-apud na. Kapin 150 ka mag-uuma ug mamumuong-panguma gikan sa Hacienda Luisita, Tarlac, ang nagprotesta sa DAR sa Quezon City niadtong Enero 26 para kundenahon ang hilabihang nadelatar nga pag-apud-apud sa yuta ug batok sa pagpangilog sa ilang yuta sa mga burgesya-kumprador, pasismo ug militarisasyon sa asyenda.

Nasudnong minorya sa Benguet, kontra sa mina. Subling nagprotesta ang nasudnong minorya ug residente sa duha ka barangay sa Itogon, Benguet niadtong Enero 27 aron babagan ang pagpalapad sa operasyon sa Sangilo Mines, gipanag-iyahan sag Itogon-Suyoc Resources, Inc. Giatol ang protesta sa gipahigayong “public scoping” nga gipatawag sa DENR sa Barangay Tuding.

Batok sa pribatisasyon sa merkado sa Cebu, nagpadayon. Nagprotesta ang mga manindahay nga sakop sa Carbonhanong Alliance niadtong Pebrero 5 isip kabahin sa nagpadayon nilang pagbabag sa pribatisasyon sa merkado. Panawagan nilang tangtangon ang Megawide Construction Inc sa konstruksyon sa merkado tungod siguradong patas-an niini ang abang sa mga pwesto.

Mamumuong-panguma sa tubuhan, nagrali sa Passi City. Kolektibong nagprotesta ang gatusan ka mamumuong-panguma sa tubuhan, gagmayng tig-galing, ug myembro sa lain-laing kahugpungan sa mag-uuma sa tubuhan sa Passi City, Iloilo niadtong Enero 22. Gimakmak nila ang padayon nga pag-ubos sa presyo sa asukal nga, matud nila, bunga sa pagbaha sa importasyon niini sa bansa ug pagkainutil sa Sugar Regulatory Administration.

Pagbabag sa kabus nga mapalayas sa UP SDG Park. Nagmartsa ang mga residente sa mga kabus sa komunidad sulod sa UP Diliman sa kalsada sa University Avenue niadtong Pebrero 5 aron babagan ang pagtukod sa proyektong Sustainable Development Goals Wellness Park sa gikahilunaan sa ilang mga balay ug umahan. Gisugat sila sa mga representante sa mga konseho sa estudyante gikan sa lain-laing kampus sa UP nga kaniadto nagpahigayon sa ilang tinuig nga tigum.