Paspas nga gibasura sa mga kaalyado ni Pres. Ferdinand Marcos Jr sa Kongreso ang gisumiteng reklamong impeachment aron tangtangon siya sa Malacañang. Gisalang kini sa Committe on Justice sa Kongreso niadtong Pebrero 4 kung asa, sa botong 39-7, gideklarang “dili igo ang unod” sa kasong gipasaka batok sa presidente.

Wala na nakurat ang blokeng Makabayan sa pagbasura sa reklamo. Matud niini, timaan kini sa kadunot sa sistema sa gubyerno, diin ginapanalipdan sa Kongreso ang interes sa mga kawatan ug kurakot. Alang sa pito ka mibotar pabor aron taralon ang presidente, paigo ang batakang pagluib sa pagsalig sa katawhan (betrayal of public trust).

Mosunod nga isalang sa Kongreso ang duha ka reklamong impeachment batok kang Vice Pres. Sara Duterte nga gisumite niadtong Pebrero 2. Usa dinhi ang giendorso usab sa blokeng Makabayan.

Sa parehong pagsang-at sa mga reklamo, nagtapok ang mga progresibong grupo sa gawas sa Kongreso aron suportahan ang ilang mga representante nga nagsumite niini. Kini ang kinaunhang higayon sa kasaysayan sa nasud nga parehong adunay lakang para tangtangon sa pwesto ang presidente ug iyang bise pinaagi sa impeachment. Panawagan nila: “Marcos, Duterte, parehong korap, angay ma-impeach!