Mahugot nga ginkundenar han panrehiyon nga komite han International League of Peoples’ Struggle (ILPS) ha Europe an tikagrabe nga atake kontra ha katawhan han Rojava nga nagtikang hadton syahan nga mga semana han Enero. Ginlaladawan han ILPS an nahitatabo nga opensiba komo “grabe ngan natikapintas nga kampanya han kamadarahug, pagpapaebakwet ngan kolektibo nga pagsirot” nga waray pagtahud ha kinabuhi han mga sibilyan ngan batakan nga dignidad han tawo. Pahimatngon hini, namamangpangan an hiluagan nga masaker ha katawhan nga Kurdish.

Ha pahayag hini, gintagan-duon han ILPS Europe nga an mga pag-atake ha Rojava nakasubay ha mga katuyuanan ha pulitika ngan militar han mga poderoso nga estado ha rehiyon ngan han ira imperyalista nga amo. Ginsusumpay han grupo an opensiba ha mas hiluag nga estratehiya han kooperasyon nga US-Zionista-Turkish nga nakatadong ha paghahadi ha West Asia.

Mahugot nga ginsukna han ILPS Europe an mga gubyerno ha Europe ha pakikigkonsabuhay ha opensiba pinaagi han pagpopondo ngan pagsuporta ha rehimen ngan mga armado nga grupo nga dabi ha pag-atake ngan pagmasaker ha katawhan nga Kurdish.