Nainget a kinundenar ti pangrehiyon a komite ti International League of Peoples’ Struggle (ILPS) idiay Europe ti kumarkaro nga atake laban iti umili ti Rojava a nangrugi kadagiti maudi a lawas ti Enero. Iladladawan ti ILPS ti mapaspasamak nga opensiba kas “nakaro ken kumarkaro a kampanya ti kinaranggas, panagpatalaw ken kolektibo a panagdusa” nga awanan respeto iti biag dagiti sibilyan ken basaran a dignidad ti tao. Ballaag daytoy, nakalayat ti nasaknap a masaker iti umili a Kurdish.

Iti pablaak daytoy, tinalmegan ti ILPS-Europe a dagiti panagatake idiay Rojava ket maitunos kadagiti panggep iti pulitika ken militar dagiti nabileg nga estado iti rehiyon ken ti imperyalista nga amo da. Isilsilpo ti grupo ti opensiba iti nalawlawa nga estratehiya ti kooperasyon ti US-Zionista-Turkish a nakaturong iti panagari da iti West Asia.

Nainget a binabalaw ti ILPS Europe dagiti gubyerno iti Europe iti pannakikunsabos iti opensiba babaen ti panagpondo ken panagsuporta iti rehimen ken dagiti armado a grupo a sangkot iti panagatake ken panagmasaker iti umili a Kurdish.