Iti panaglukat ti maikadwa a semestre daytoy Enero-Pebrero, insayangkat dagiti estudyante dagiti protesta ken aktibidad iti saan a bumaba iti 11 nga unibersidad. Ginasut ti nagtitipon tapno ituloy da nga ilaban ti demokratiko a karbengan da, singiren ti rehimen Marcos iti nasaknap a korapsyon ken labanan ti represyon.

Iti University of the Philippines (UP) System, naisayangkat dagiti protesta iti 10 kampus daytoy. Kalatakan ditoy ti panagmartsa ti nasurok 550 estudyante ti UP Los Baños idiay Laguna idi Enero 19.

Napasamak met dagiti protesta iti Polytechnic University of the Philippines, Technological University of the Philippines-Manila, Far Eastern University, University of Santo Tomas, De La Salle University, Ateneo de Manila University, National Teachers’ College, Saint Louis University idiay Baguio City, Cavite State University ken iti University of San Carlos idiay Cebu City.

Takder kontra TOFI. Limmatak kadagiti protesta ti panagsupyat kadagiti gakat a panangipangato ti matrikula (tuition and other fee increase o TOFI) kadagiti pribado nga unibersidad. Irasrason dagiti unibersidad ti ngumatngato a gastos iti edukasyon, panangpadur-as kadagiti pasilidad ken nangatngato a sweldo para kadagiti manursuro ken empleyado. Kanaig daytoy, nagisayangkat ti National Union of Students of the Philippines (NUSP) ti 5-punto a kadawatan laban iti TOFI.

Kabayatanna, dinayaw ti NUSP dagiti estudyante ti University of the East ken DLSU kasaruno ti nabiit pay nga anunsyo ti administrasyon ti dua nga unibersidad a saan nga agipatungpal daytoy ti TOFI iti akademiko a tawen ti 2026-2027. Intunda daytoy dagiti petisyon, dayalogo, protesta ken sangsangkamaysa a tignay dagiti estudyante, konseho dagiti estudyante ken dagiti progresibo a grupo.