Ha pag-abre han ikaduha nga semestre hini nga Enero-Pebrero, iginlansar han mga estudyante an mga protesta ngan aktibidad ha diri mamenos ha 11 nga unibersidad. Gatus-gatos an nagtirok agud padayon nga ipakigbisog an ira demokratiko nga katungod, sukton an rehimen Marcos ha hiluagan nga korapsyon ngan atuhan an panmuypoy.

Ha University of the Philippines (UP System), iginlansar an mga protesta ha 10 nga kampus hini. Pinakalandaw dinhi an pagmartsa han masobra 550 nga estudyante han UP Los Baños ha Laguna hadton Pebrero 19.

Nagkamayda liwat han mga protesta ha Polytechnic University of the Philippines, Technological University of the Philippines-Manila, Far Eastern University, University of Santo Tomas, De La Salle University, Ateneo de Manila University, National Teachers’ College, Saint Louis University ha Baguio City, Cavite State University ngan ha University of San Carlos ha Cebu City.

Tindog kontra TOFI. Nagin landaw ha mga protesta an pagtipa ha mga ginproponer nga paghitaas han matrikula (tuition and other fees o TOFI) ha mga pribado nga unibersidad. Igipapasangilan han mga unibersidad an nahitaas nga gastos ha edukasyon, pagpapauswag han mga pasilidad, ngan mas hitaas nga sweldo para ha mga magturutdo ngan empleyado. Kasumpay hini, naglansar an National Union of Students of the Philippines (NUSP) han 5 nga punto nga demanda kontra ha TOFI.

Samtang, gindayaw han NUSP an mga estudyante han University of the East ngan DLSU kasunod han diri pala maiha nga anunsyo han administrasyon han duha nga unibersidad nga diri ini magpapatuman han TOFI ha akademiko nga tuig 2026-2027. Iginbunga ini han petisyon, dayalogo, protesta ngan duruyog nga paggios han mga estudyante, konseho han estudyante ngan mga progresibo nga grupo.