Sa pagbukas sang ikaduha nga semestre sining Enero-Pebrero, ginlunsar sang mga estudyante ang mga protesta kag aktibidad sa indi magnubo sa 11 ka unibersidad. Ginatos ang nagtipon para padayon nga ipakigbato ang ila demokratikong kinamatarung, sukton ang rehimen Marcos sa lapnagon nga korapsyon kag pakigbatuan ang pagpanumpo.

Sa University of the Philippines (UP) System, ginlunsar ang mga protesta sa 10 ka kampus sini. Pinakamatingkad diri ang pagmartsa sang masobra 550 ka estudyante sang UP Los Baños sa Laguna sadtong Enero 19.

May mga protesta man sa Polytechnic University of the Philippines, Technological University of the Philippines-Manila, Far Eastern University, University of Santo Tomas, De La Salle University, Ateneo de Manila University, National Teachers’ College, Saint Louis University sa Baguio City, Cavite State University kag sa University of San Carlos sa Cebu City.

Tindog kontra TOFI. Nangin unod sang mga protesta ang pagpamatuk sa mga ginaproponer nga pagpasaka sang matrikula (tuition and other fee increase ukon TOFI) sa mga pribadong unibersidad. Ginarason sang mga unibersidad ang nagasaka nga gasto sa edukasyon, pagpauswag sa mga pasilidad, kag mas mataas nga sweldo para sa mga manunudlo kag empleyado. Kaangot sini, naglunsar ang National Union of Students of the Philippines (NUSP) sang 5-punto nga demanda batuk sa TOFI.

Samtang, gindayaw sang NUSP ang mga estudyante sang University of the East kag DLSU sunod sang sini lang nga anunsyo sang administrasyon sang duha ka unibersidad nga indi ini magpatuman sang TOFI sa akademiko nga tuig sang 2026-2027. Bunga ini sang petisyon, dayalogo, protesta kag ululupod nga paghulag sang mga estudyante, konseho sang mga estudyante kag mga progresibong grupo.