Daga iti Hacienda Luisita, ibunongen. Nasurok 150 mannalon ken mangmangged-talon manipud iti Hacienda Luisita, Tarlac, ti nagprotesta iti DAR idiay Quezon City idi Enero 26 tapno kundenaren ti palalon a naitantan a panangibunong ti daga ken laban iti panangagaw ti daga dagiti burgesya-kumprador, pasismo ken militarisasyon iti asyenda.

Katutubo nga umili ti Benguet, kontra iti minas. Balbaliw a nagprotesta ti katutubo nga umili ken residente ti dua a barangay ti Itogon, Benguet idi Enero 27 tapno supyaten ti panagpalawa ti operasyon ti Sangilo Mines, sanikua ti Itogon-Suyoc Resources, Inc. Ti tignay ket nairana iti naiyaramid a “public scoping” nga inyawag ti DENR idiay Barangay Tuding.

Laban iti pribatisasyon ti palengke idiay Cebu, agtultuloy. Nagprotesta dagiti aglaklako iti sidong ti Carbonhanong Alliance idi Pebrero 5 kas paset ti agtultuloy a panagsupyat da iti pribatisasyon ti palengke. Panawagan da nga ikkaten ti Megawide Construction Inc iti konstruksyon ti palengke gapu ta sigurado nga ingato daytoy ti abang kadagiti pwesto.

Mangmangged iti kaunasan, nagrali idiay Passi City. Agkakadwa a nagprotesta ti ginasut a mangmangged-talon iti kaunasan, babassit a para-giling ken kamkameng ti nadumaduma a timpuyog ti aguunas idiay Passi City, Iloilo idi Enero 22. Binabalaw da ti agtultuloy a panagbagsak ti presyo ti asukar, a kunada ket mangitunda ti panagtayok ti importasyon daytoy iti pagilyan ken kinainutil ti Sugar Regulatory Administration.

Panagkedked dagiti nakurapay a mapatalaw ti UP SDG Park. Nagmartsa dagiti residente dagiti nakurapay iti komunidad iti uneg ti UP Diliman iti bennat ti University Avenue idi Pebrero 5 tapno supyaten ti panagitakder ti proyekto a Sustainable Development Goals Wellness Park iti nagtakderan ti pagtaengan ken talon da. Sinabat isuda dagiti mangibagi kadagiti konseho ti estudyante manipud iti nadumaduma a kampus ti UP nga idi ket mangang-angay ti tinawen a pulong da.