Tuna ha Hacienda Luisita, igdistribwer na. Masobra 150 nga parag-uma ngan trabahador ha uma tikang ha Hacienda Luisita, Tarlac, an nagprotesta ha DAR ha Quezon City hadton Enero 26 agud kundenaron an sobra na nga nadelatar nga distribusyon han tuna ngan kontra ha panlulupot han ira tuna han mga kumprador burgesya, pasismo ngan militarisasyon ha asyenda.

Minoriya nga katawhan han Benguet, kontra ha mina. Utro nga nagprotesta an minoriya nga katawhan ngan residente han duha nga barangay ha Itogon, Benguet hadton Enero 27 agud tipahan an pagpapahiluag han operasyon han Sangilo Mines, pananag-iya han Itogon-Suyoc Resources, Inc. Igintuman an paggios ha ginhimo nga “public scoping” nga iginpatawag han DENR ha Barangay Tuding.

Pakigbisog ha pribatisasyon han merkado ha Cebu, nagpapadayon. Nagprotesta an mga parupaninda ha ilarum han Carbonhanong Alliance hadton Pebrero 5 komo kaparte han nagpapadayon nira nga pagtipa ha pribatisasyon han merkado. Panawagan nira nga tanggalon an Megawide Construction Inc ha konstruksyon han merkado tungod kay piho nga papahitas-on hini an plete ha mga pwesto.

Trabahador ha tubuhan, nagrali ha Passi City. Duruyog nga nagprotesta an gatus-gatos nga trabahador ha uma ha tubuhan, gudti nga tagamolino, ngan membro han magkalain-lain nga asosasyon han parag-uma han tubo ha Passi City, Iloilo hadton Enero 22. Ginsukna nira an padayon nga pagbagsak han presyo han asukar nga, sering nira, durot han paghitaas han importasyon hini ha nasud ngan kawaray pulos han Sugar Regulatory Administration.

Pagtipa han kablas nga mapapalayas han UP SDG Park. Nagmartsa an mga residente han mga kablas nga komunidad ha sakob han UP Diliman ha kahilab-on han University Avenue hadton Pebrero 5 agud tipahan an pagtindog han proyekto nga Sustainable Development Goals Wellness Park nga gintitindugan han ira mga balay ngan umhanan. Gintapo hira han mga tinaglawas han mga konseho han estudyante tikang ha magkalain-lain nga kampus han UP nga hadto naglalansar han ira tinuig nga miting.