Duta sa Hacienda Luisita, ipanagtag na. Masobra 150 ka mangunguma kag mamumugon sa uma halin sa Hacienda Luisita, Tarlac, ang nagprotesta sa DAR sa Quezon City sadtong Enero 26 para kundenaron ang sobra nga pagkaatrasar sa pagpanagtag sang duta kag batuk sa pagpang-agaw sang ila duta sang mga burgesya-kumprador, pasismo kag militarisasyon sa asyenda.

Tumandok nga pumuluyo sang Benguet, kontra sa mina. Liwat nagprotesta ang tumandok nga pumuluyo kag residente sang duha ka barangay sang Itogon, Benguet sadtong Enero 27 para pamatukan ang pagpalapad sang operasyon sang Sangilo Mines, nga ginapanag-iyahan sang Itogon-Suyoc Resources, Inc. Gintuon ang hublag sa ginapatigayon nga “public scoping” nga ginpatawag sang DENR sa Barangay Tuding.

Batuk sa pribatisasyon sang merkado sa Cebu, nagapadayon. Nagprotesta ang mga manugtinda sa idalum sang Carbonhanong Alliance sadtong Pebrero 5 bilang kabahin sang nagapadayon nila nga pagpamatuk sa pribatisasyon sang merkado. Panawagan nila nga kakason ang Megawide Construction Inc sa konstruksyon sang merkado tungod segurado nga pasakaon sini ang arkila sa mga pwesto.

Mamumugon sa katubuhan, nagrali sa Passi City. Ululupod nga nagprotesta ang ginatos ka mamumugon sa uma sa katubuhan, magagmay nga manug-galing, kag myembro sang lain-lain nga asosasyon sang manugtubo sa Passi City, Iloilo sadtong Enero 22. Ginbatikos nila ang padayon nga pagsarurot sang presyo sang kalamay nga, suno sa ila, bunga sang pagbutyog sang importasyon sini sa pungsod kag pagka-inutil sang Sugar Regulatory Administration.

Pagpamatuk sang imol nga mapalayas sang UP SDG Park. Nagmartsa ang mga residente sang mga imol nga komunidad sa sulod sang UP Diliman sa mga dalanon sang University Avenue sadtong Pebrero 5 agud pamatukan ang pagtukod sang proyektong Sustainable Development Goals Wellness Park nga ginatindugan sang ila mga balay kag ulumhan. Ginsugata sila sang mga tiglawas sang mga konseho sang mga estudyante halin sa lain-lain nga kampus sang UP nga sadto nagahiwat sang ila tuigan nga pagpulong.