Naglunsar sang pungsodnon nga welga ang pumuluyo sang US bilang protesta sa nagasingki nga patarasak nga pasismo sang mga ahente sang Immigration and Customs Enforcement (ICE) kag Customs and Border Patrol (CBP) sadtong Enero 30. Gintawag ang protesta nga “National Shutdown: No Work. No School. No Shopping. Stop Funding ICE.”

Natabo ang 300 ka aksyon protesta kag welga sa 50 ka estado, sa pagpanguna sang masobra 1,000 ka organisasyon. Lakip sa nag-organisa sang aksyon ang mga grupo sang mga Pilipino kasubong sang Anakbayan, Malaya Movement, League of Filipino Students, Defend Migrants Alliance kag Migrante USA. Unod sang protesta ang pag-walk-out sang linibo ka estudyante sa hasykul kag kolehiyo halin sa lain-lain nga syudad. Pila ka libo nga negosyo ang temporaryo nga nagsira kag nagpahayag sang suporta sa welga.

Ginlunsar ang welga sa tunga sang nagasingki nga kalakasan sa Minnesota. Mga 3,000 ka ahente halin sa Department of Homeland Security ang gin-deploy sa idalum sang Operation Metro Surge, agud lagson ang mga imigrante kag magsabwag sang kahadlok sa pumuluyo. Nagdangat ang kalakasan sa pagpatay sang ahente sang ICE kay Renee Good, isa ka manunulat sadtong, Enero 7. Ginsundan ini sang pagpatay sang mga ahente sang CBP kay Alex Pretti, isa ka nars, sadtong Enero 24. Magluwas sa duha ka biktima, ginpatay man sang mga ahente sang ICE sanday Keith Porter, isa ka US citizen kag Silverio Villegas González, isa ka imigrante halin sa Mexico.

Sa Minnesota ginlunsar ang una nga bulwak sang pangkabug-osan nga welga sadtong Enero 23. Naglab-ot sa 50,000 ang nagpakigbahin sa protesta kag masobra 700 ka negosyo ang nagsira sa adlaw nga ini. Mga 80,000 ka mamumugon halin sa Minneapolis Regional Labor Federation ang nagsuporta sa hublag.

Sugod sang nagpungko sa pwesto si Trump, masobra 30 na ang napatay samtang nakadetenir sa mga pasilidad sang ICE. Ang masami kabangdanan sang pagkapatay amo ang pagpabaya sa ikaayong-lawas sang ginadetenir.