Naglansar hin nasyunal nga welga an katawhan han US komo protesta ha natikapintas nga waray wantas nga pasismo han mga ahente han Immigration and Customs Enforcement (ICE) ngan Customs and Border Patrol (CBP) hadton Enero 30. Gintawag an protesta nga “National Shutdown: No Work. No School. No Shopping. Stop Funding ICE.” (Nasyunal nga Welga: Waray Trabaho. Waray Eskoyla. Waray Panmalit. Ayaw Pondohi an ICE.)

Nahitabo an 300 nga gios-protesta ngan welga ha 50 nga estado, ha pangunguna han masobra 1,000 nga organisasyon. Kaupod ha nag-organisa han paggios an mga grupo han mga Pilipino sugad han Anakbayan, Malaya Movement, League of Filipino Students, Defend Migrants Alliance ngan Migrante USA. Landaw nga protesta an pag-walkout han yukut-yukot nga estudyante ha hayskul ngan kolehiyo tikang ha magkalain-lain nga syudad. Pira kayukot nga negosyo an temporaryo nga nagserra ngan nagpahayag han suporta ha welga.

Ginlansar an welga ha butnga han natikagrabe nga kamadarahug ha Minnesota. Aada ha 3,000 nga ahente tikang ha Department of Homeland Security an gindeploy ilarum han Operation Metro Surge, agud lanaton an mga imigrante ngan magsabrag hin kahadlok ha katawhan. Naggrabe an kamadarahug ha pagpatay han ahente han ICE kan Renee Good, usa nga paragsurat, hadton Enero 7. Ginsundan ini han pagpatay han mga ahente han CBP kan Alex Pretti, usa nga nars, hadton Enero 24. Labot ha duha nga biktima, ginpatay liwat han mga ahente han ICE hira Keith Porter, usa nga US citizen ngan Silverio Villegas González, usa nga imigrante tikang Mexico.

Ha Minnesota ginlansar an syahan nga hugna han pankabug-usan nga welga hadton Enero 23. Inabot ha 50,000 an pinartisipar ha protesta ngan masobra 700 nga negosyo an nagserra hiton nga adlaw. Aada ha 80,000 nga trabahador tikang ha Minneapolis Regional Labor Federation an sinuporta ha paggios.

Tikang han liningkod ha pwesto hi Trump, masobra 30 an namatay samtang nakadetiner ha mga pasilidad han ICE. Kaagsuban nga rason han pagkamatay amo an kapasibay-an ha kalibsugan han mga nakadetiner.