Insayangkat ti umili ti US ti nailyan a welga kas protesta iti uming-inget a pasismo dagiti ahente ti Immigration and Customs Enforcement (ICE) ken Customs and Border Patrol (CBP) idi Enero 30. Ti protesta ket naawagan a “National Shutdown: No Work. No School. No Shopping. Stop Funding ICE.”

Napasamak ti 300 tignay protesta ken welga iti 50 estado, iti panangiyuna ti nasurok 1,000 organisasyon. Kabilang iti nagorganisa ti tignay dagiti grupo dagiti Pilipino kas ti Anakbayan, Malaya Movement, League of Filipino Students, Defend Migrants Alliance ken Migrante USA. Tampok a protesta ti panag-walkout ti rinibo nga estudyante iti hayskul ken kolehiyo manipud iti nadumaduma a syudad. Mano ribo a negosyo ti temporaryo a nagserra ken nagiyebkas ti suporta iti welga.

Ti welga ket naisayangkat iti tengnga ti uming-inget a kinaranggas idiay Minnesota. Adda ti 3,000 ahente manipud iti Department of Homeland Security ti naideploy iti sidong ti Operation Metro Surge, tapno kamaten dagiti imigrante ken agimula ti buteng iti umili. Nagalimpatok ti kinaranggas iti panangpatay ti ahente ti ICE ken Renee Good, maysa a mannurat, idi Enero 7. Sinaruno daytoy ti panangpatay dagiti ahente ti CBP ken Alex Pretti, maysa a nars idi Enero 24. Malaksid iti dua a biktima, pinatay met dagiti ahente ti ICE da Keith Porter, maysa a US citizen ken ni Silverio Villegas González, maysa nga imigrante manipud Mexico.

Idiay Minnesota, naisayangkat ti umuna a bugso ti kabuklan a welga idi Enero 23. Dumanon iti 50,000 ti dimmar-ay iti protesta ken nasurok 700 negosyo ti nagserra iti didiay nga aldaw. Adda ti 80,000 a mangmangged manipud iti Minneapolis Regional Labor Federation ti simmuporta iti tignay.

Manipud idi nagtugaw iti pwesto ni Trump, nasurok 30 ti pimmusay bayat a nakabalud da kadagiti pasilidad ti ICE. Kadawyan a makagapu ti pannakatay da ket ti panagbaybay-a iti salun-at dagiti balud.