Ginkilala ngan ginpasidunggan han rebolusyunaryo nga kagiusan ha Negros hadton Pebrero hi Reynaldo Erecre (Ka Amek) ha iya riko nga amot ha pagpapasulong han rebolusyon ha Negros ngan Central Visayas. Ginpatay hi Erecre han pasista nga tawuhan han 94th IB kahuman hiya madakop hadton Enero 30 ha Sityo Apitong, Barangay Bi-ao, Binalbagan, Negros Occidental.

Sigon ha report han Bagong Hukbong Bayan (BHB)-South Central Negros (Romeo Nanta Command), waray kapas nga umato hi Erecre han nadakop hiya han mga sundalo han AFP. Tuyo hiya nga ginpatay gamit an sobra-sobra nga pwersa, hinungdan kun kay ano nga diri makilala an iya nawong.

Hi Erecre an sekretaryo han Panrehiyon nga Komite han Partido ha Negros han namartir hiya. Nagtikang hiya ha klase nga ubos nga petiburges ngan dinako ha Maco, Davao de Oro. Nagtrabaho hiya ha usa nga pabrika han plywood han umundang ha pag-eskoyla ha kurso nga Bachelor of Science in Education.

Nagpultaym hiya ha BHB hadton 1996. Kahuman han tulo katuig ha serbisyo nagin kagawad hiya han komite han prente. Naging kaparte hiya han yunit partisano han BHB ha Cebu ngan Bohol. Usa liwat hiya ha mga nanguna ha maisugon nga reyd ha hedkwarters han PNP ha Bohol hadton Hunyo 1999 diin nakumpiska an masobra 80 nga armas. Hadton 2024, nahibutang hiya nga upisyal han Komite nga Tagapagpatuman han Panrehiyon nga Komite ha Central Visayas.

Hadton 2006, nahibalhin han buruhaton ni Erecre ha isla han Negros ngan nagserbe nga kumander ngan ikaduha nga sekretaryo han Partido ha prente han Southeast Negros. Tikang 2019, nagin kumander hi Erecre han panrehiyon nga kumand han BHB ha isla han Negros (Apolonio Gatmaitan Command) ngan nagin kaparte han Sekretaryat han Panrehiyon nga Komite han Partido ha bug-os nga isla. Tikang 2023, nagserbe hiya nga sekretaryo han Partido ha isla. Aktibo hiya nga nanguna ngan nag-undong ha pagsusulong han kagiusan pagtutul-id ha isla.

Samtang, namartir ha nahitabo nga engkwentro hi Joem Golez. Usa hiya nga istap ha buruhaton medikal han panrehiyon nga kumand han BHB. Nagtikang hiya ha klase nga kablas nga parag-uma ngan residente han Barangay Quintin Remo, Moises Padilla. Inapi hi Golez ha hukbo han katawhan hadton 2016.