Ginkilala kag ginpasidunggan sang rebolusyonaryong kahublagan sa Negros sadtong Pebrero si Reynaldo Erecre (Ka Amek) sa iya manggaran nga amot sa pagsulong sang rebolusyon sa Negros kag Central Visayas. Ginpatay si Erecre sang pasistang mga tinawo sang 94th IB pagkatapos siya madakop sadtong Enero 30 sa Sityo Apitong, Barangay Bi-ao, Binalbagan, Negros Occidental.

Suno sa report sang Bagong Hukbong Bayan (BHB)-South Central Negros (Romeo Nanta Command), wala sa tindog nga makig-away si Erecre sang nadakop siya sang mga soldado sang AFP. Hungod siya nga ginpatay gamit ang sobra-sobra nga pwersa, kabangdanan kon nga-a indi na makilal-an ang iya nawong.

Si Erecre ang sekretaryo sang Pangrehiyon nga Komite sang Partido sa Negros sang siya namartir. Naghalin siya sa sahing manubo nga petiburges kag nagdako sa Maco, Davao de Oro. Nagtrabaho siya sa isa ka pabrika sang plywood, nag-untat sa pag-eskwela sa kurso nga BS in Education.

Nagpultaym siya sa BHB sadtong 1996. Pagkatapos sang tatlo ka tuig sa serbisyo nangin kagawad siya sang komite sa larangan. Nangin kabahin siya sang yunit sang partisano sang BHB sa Cebu kag Bohol. Isa man siya sa mga nagpanguna sa makahas nga reyd sa hedkwarters sang PNP sa Bohol sadtong Hunyo 1999 kon diin nakumpiskar ang masobra sa 80 ka armas. Sadtong 2004, gintalana siya nga opisyal sang Komiteng Tagpatuman sang Komiteng Rehiyon sa Central Visayas.

Sadtong 2006, ginsaylo ang hilikuton ni Erecre sa isla sang Negros kag nagserbe nga kumander kag ikaduha nga sekrektaryo sang Partido sa larangan sang Southeast Negros. Sugod 2019, nangin kumander si Erecre sang pangrehiyon nga kumand sang BHB sa isla sang Negros (Apolinario Gatmaitan Command) kag nangin kabahin sang Kalihiman sang Komiteng Rehiyon sang Partido sa bug-os nga isla. Sugod 2023, nagserbe siya nga sekretaryo sang Partido sa isla. Aktibo siya nga nagpanguna kag nagtib-ong sa pagsulong sang kahublagan panadlong sa isla.

Samtang, namartir sa natabo nga engkwentro si Joem Golez. Isa siya sang istap sa hilikuton medikal sang pangrehiyon nga kumand sang BHB. Naghalin siya sa sahing imol nga mangunguma kag residente sang Barangay Quintin Remo, Moises Padilla. Nagpatapo si Golez sa hukbo sang banwa sadtong 2016.