Napaspas nga inbasura dagiti kaalyado ni Pres. Ferdinand Marcos Jr iti Konggreso ti naipila a reklamo nga impeachment tapno ikkaten isuna iti Malacañang. Nataming daytoy iti Committe on Justice ti Konggreso idi Pebrero 4, nu sadinno nga iti botos a 39-7, ket naideklara a “saan a makaanay ti linaon” ti kaso a naipila laban iti presidente.

Saanen a nasdaaw ti bloke a Makabayan iti pannakaibasura iti reklamo. Kuna ti grupo, pammaneknek daytoy ti bulok a sistema ti gubyerno, nu sadinno a salsalakniban ti Konggreso ti interes dagiti agtatakaw ken kurakot. Para iti pito a nagbotos pabor iti pananglitis iti pangulo, naan-anay ti basaran a panangliput iti talek ti umili (betrayal of public trust).

Sumaruno a tamingen ti Konggreso ti dua a reklamo nga impeachment laban ken Vice Pres. Sara Duterte a naisumite idi Pebrero 2. Maysa ditoy ket inyendorso met ti bloke a Makabayan.

Iti kapada a panagipila kadagiti reklamo, nagtaripnong dagiti progresibo a grupo iti ruar ti Konggreso tapno suportaran dagiti mangibagi kadakwada a nangipila ditoy. Daytoy ti kaunaan a gundaway iti pakasaritaan ti pagilyan nga agpada nga adda ti addang tapno ikkaten iti pwesto ti presidente ken ti bise na babaen ti impeachment. Awag da: “Marcos, Duterte, agpada a korap, rumbeng a ma-impeach!”