Madagmit nga iginbasura han mga kaalyado ni Pres. Ferdinand Marcos Jr ha Kongreso an iginsalawad nga reklamo nga impeachment agud tanggalon hiya ha Malacañang. Iginsalang ini ha Committee on Justice han Kongreso hadton Pebrero 4 kun diin, ha botos nga 39-7, igindeklara nga “diri sadang an unod” han kaso nga iginsalawad kontra ha presidente.

Diri na natigdaan an bloke nga Makabayan ha pagbabasura han reklamo. Sering hini, pamatuod ini nga dunot an sistema han gubyerno, kun diin gindedepensahan han Kongreso an interes han mga parupangawat ngan kurakot. Para ha pito nga binotos pabor para bistahon an presidente, sadang an basaranan ha pagtraydor ha pagtapod han katawhan (betrayal of public trust).

Kasunod nga igsasalang han Kongreso an duha nga reklamo nga impeachment kontra kan Vice Pres. Sara Duterte nga iginsubmiter hadton Pebrero 2. Usa hini igin-endorso gihap han bloke nga Makabayan.

Ha pareho nga pagsalawad han mga reklamo, nagtirok an mga progresibo nga grupo ha gawas han Kongreso para suportahan an ira mga tinaglawas nga nagsalawad hini. Ini an syahan nga higayon ha kasaysayan han nasud nga pareho nga mayda pitad agud tanggalon ha pwesto an presidente ngan iya bise presidente pinaagi han impeachment. Panawagan nira: “Marcos, Duterte, pareho nga korap, kinahanglan ma-impeach!”