Madasig nga ginbasura sang mga kaalyado ni Pres. Ferdinand Marcos Jr sa Kongreso ang ginhapag nga reklamo nga impeachment para kakason siya sa Malacañang. Gintalakay ini sa Committe on Justice sang Kongreso sadtong Pebrero 4 kon diin, sa boto nga 39-7, gindeklarar nga “indi bastante ang unod” sang kaso nga ginpasaka batuk sa presidente.

Wala nakibot ang blokeng Makabayan sa pagbasura sang reklamo. Suno diri, pamatuod ini sang dunot nga sistema sang gobyerno, kon diin ginapangapinan sang Kongreso ang interes sang mga kawatan kag kurakot. Para sa pito nga nagboto pabor nga bistahon ang pangulo, bastante ang basehan sa pagtraidor sa pagsalig sang pumuluyo (betrayal of public trust).

Sunod nga gintalakay sang Kongreso ang duha ka reklamo nga impeachment batuk kay Vice Pres. Sara Duterte nga ginsumite sadtong Pebrero 2. Isa diri gin-endorso man sang bloke nga Makabayan.

Sa pareho nga paghapag sang mga reklamo, nagtipon ang mga progresibong grupo sa guwa sang Kongreso agud suportahan ang ila mga tiglawas nga naghapag sini. Ini ang pinakauna nga higayon sa kasaysayan sang pungsod nga pareho nga may tikang para kakason sa pwesto ang presidente kag iya bise paagi sa impeachment. Panawagan nila: “Marcos, Duterte, pareho nga korap, dapat ma-impeach!