Naga-ugyon ang mga Pilipino sa pagdumdom sa ika-77 nga Internasyunal nga Adlaw sang Tawhanon nga Kinamatarung sadtong Disyembre 10. Sa lain-lain nga bahin sang pungsod, linibo ang nagmartsa para itib-ong ang tawhanon nga kinamatarung kag batikuson ang rehimen Marcos sa wala-untat nga paglapas sini sa kinamatarung sang pumuluyo.

Ginpangunahan sang Karapatan kag Bagong Alyansang Makabayan (Bayan) ang mga hublag sa Manila kag 15 ka syudad kag probinsya. Nagpahayag sang suporta sa hublag ang International Coalition for Human Rights in the Philippines.

Sa Manila, linibo ang nagpakigbahin sa pagtipon kag programa sa Liwasang Bonifacio kag martsa padulong sa Mendiola. Magluwas sa mga organisasyon nga nakabase sa National Capital Region, nakig-isa sa protesta ang mga grupo halin sa Southern Tagalog. Ululupod nga panawagan nila” Tapuson ang pasista, korap, kag paantus nga rehimen US-Marcos Jr!”

Sadtong Mayo 2025, pormal nga ginpatuman sang rehimen Marcos ang National Action Plan for Unity, Peace, and Development 2025-2028. Nagserbe ini nga balayon sang ginpasingki nga pangpulitika nga pagpangsumpo sa pumuluyo. Nagapanguna nga ginapatuman ini sang National Task Force-Elcac.

Sa lista sang Karapatan, indi magnubo sa 11 ka milyon ka Pilipino ang nangin biktima sang paglapas sa tawhanon nga kinamatarung sang mga pwersa sang estado sa idalum sang rehimen Marcos. Lakip sa ila ang mga biktima sang ekstra-hudisyal nga pagpatay, pilit nga pagkadula, arbitraryo nga pag-aresto, pilit ukon peke nga pagpasungka, patarasak nga pagpaniro kag pangbomba, pilit nga pagbakwit kag pamahog, pagpanggamo kag panghadlok, lakip ang Red-tagging.

Nagapabilin nga nabilanggo ang indi magnubo sa 696 nga bilanggong pulitikal, 163 gin-aresto sa idalum ni Marcos. Sa mga bilanggong pulitikal, 136 ang kababaehan, 93 ang mga tigulang na, kag 89 ang may balatian. May nabilanggo man nga 12 ka konsultant kag istap sang National Democratic Front of the Philippines para sa negosasyon pangkalinong.

Sa pagtapos sang protesta sa Mendiola, ginsunog sang mga grupo ang effigy nanday Marcos kag Sara Duterte nga ginalaragway bilang hari kag reyna sang pasismo kag korapsyon. Ginpakita sang effigy nga may dala nga armalayt sanday Marcos kag Duterte samtang nagapungko sa mga maleta nga simbolo sang korapsyon.

Amo man nga mga protesta kag aktibidad ang ginlunsar sa Baguio City, Tabuk City sa Kalinga, Mountain Province, Laoag City sa Ilocos Norte, Tarlac, Nueva Ecija, Bulacan, Legazpi City sa Albay, Naga City sa Camarines Sur, Iloilo City, Kalibo City sa Aklan, Roxas City sa Capiz, Bacolod City, Cebu City, kag Davao City.

Pagtib-ong sa tawhanon nga kinamatarung sang simbahan kag mga kongresista

Halin pa sa panahon sang anay rehimen Duterte, pinakamadugo ang rekord sang estado sa paglapas sa tawhanon nga kinamatarung sa Mindanao. Pinaka-grabe ini sadtong ginpatuman ang layi militar sugod Mayo 2017 tubtob 2019.

Sadtong Disyembre 9-10, ginlunsar sa Davao City ang Mindanao Human Rights Summit. Gintambunang ini sang 242 ka delegado halin sa simbahan, subong man sang mga abogado, tigpangapin sang tawhanon nga kinamatarung kag organisasyon masa sang Mindanao.

Sa ikaduha nga adlaw sang aktibidad, ginpatigayon ang pangkabug-osan nga asembliya kag paglunsar sang Pakighiusa sa Anawim-Mindanao (Panaw-Mindanaw). Ang bag-ong tukod nga grupo isa ka organisasyon nga ang katuyuan amo ang hatagan sang tingog kag hustisya ang mga biktima sang mga paglapas sang tawhanon nga kinamatarung sa Mindanao.

Sa Kongreso, liwat ginlunsar ang Mambabatas para sa Karapatang Pantao ukon Makatao Coalition sadtong Disyembre 9. Katuyuan sang koalisyon nga isulong ang mga layi nga magpangapin sa tawhanon nga kinamatarung. Una ini nga gintukod sang mga kongresista, lakip ang Makabayan Bloc, sadtong 2018 para pamatukan ang mga ekstra-hudisyal nga pagpamatay sang sadto rehimen Duterte. Sa subong ini ginapamunuan ni Rep. Leila de Lima.