Sa Masbate, gindakop, gintortyur antes hungod nga ginpatay sang 2nd IB ang isa ka Pulang hangaway sang Bagong Hukbong Bayan (BHB)-Masbate sadtong Disyembre 13. Ang hangaway napilasan sa tiil kag nadakop pagkatapos sang isa ka inaway sa Barangay Pitogo, Cataingan sa adlaw nga ini. Ginpaidalum siya sa brutal nga pisikal nga tortyur tungod sa pagkapatay sang duha ka soldado sang 2nd IB sa inaway.

Samtang sadtong Disyembre 9, gin-aresto sang mga pulis sa kaso nga pagpatay kag pasibangod nga mataas nga opisyal sang BHB si Juanito Bultron. Siya residente sang Barangay Teresita, Cataingan nga may deperensya sa panghuna-huna. Ginpaguwa sang pulis nga nadakop siya sa Barangay Malibas, Palanas.

Sa Occidental Mindoro, gin-abdak kag gintortyur sang 76th IB si Dolores Mariano Solangon, 47 anyos nga babaye nga Mangyan-Iraya, sa Abra de Ilog, Occidental Mindoro sadtong Disyembre 2, ala-1:30 sang hapon. Ginhigot siya sa isa ka puno kag ginpaidalum sa interogasyon tubtob alas-4:00 sang hapon.

Gindala siya sa bukiron nga erya kag liwat gintortyur tubtob alas-9:00 sang gab-i. Ginpakutkot man siya para sa kaugalingon nga lulubngan kag ginpahog nga patyon kon magpalagyo. Natabo ang pag-abdak kag pagtortyur kay Solangon pagkatapos sang isa ka engkwentro sang 76th IB sa BHB sa Sityo Balite, Barangay Lumangbayan sa Abra de Ilog sadtong Nobyembre 26.