Mas nga nag-grabe sining nagligad nga tuig 2025 ang krisis sa ekonomiya kag pulitika sang nagahari nga sistema, labi nga nagasingki ang pagpasilabot militar sang imperyalistang US kag mas nag-grabe ang sosyal nga kahimtangan sang mayoriya sang pumuluyo. Kadungan sini, nagsingki ang paghimakas batuk sa korapsyon kag pasismo sang rehimen US-Marcos.

Lubos-lubos na ang banggaan sang mga nagahari nga sahi, partikular sa bunggo-anay sang magkaribal nga hubon Marcos kag Duterte. Ginpasaka sang Manubo nga Kupulungan sadtong Pebrero ang kaso nga impeachment batuk kay Sara Duterte, apang naguot ang kaso sang banggaan mismo kay Ferdinand Marcos Jr sa pag-hearing sa Senado. Sadtong Marso, nakigbuligay si Marcos sa Interpol sa pag-aresto kag pagbilanggo sa The Netherlands sa anay presidente nga si Rodrigo Duterte tungod sa mandamyento sang International Criminal Court. Didto siya bistahon sa mga krimen sa katawhan tungod sa madamuan nga pagpatay sa “war on drugs.”

Ginhiwat sadtong Mayo ang eleksyon sa senado, kongreso kag lokal nga gobyerno. Barahubal ang dinayaay kag manipulasyon sang resulta. Ginalaragway sini ang banggi-anay kag akomodasyon sang lain-lain nga hubon sang nagahari nga sahi, kag pagpasilabot sang imperyalistang US. Samtang nagapabilin ang bug-os nga suporta sang US kay Marcos, ginapwesto naman sini ang iya mga reserba nga kabayo para sa pagdalagan sa 2028.

Wala sang tupong ang pagpasilabot militar sang US sa bug-os nga tuig. Sa pakigkunsabuhay sa rehimen Marcos kag gamit ang Armed Forces of the Philippines (AFP), ginbuksan ang bag-o nga mga base kag pasilidad militar. Nagbutang ang US sang dugang nga mga armas pang-gyera sa Pilipinas. Wala puas ang ginapatigayon nga pagpanulsol nga mga ehersisyo militar sa sulod kag palibot sang South China Sea, sa kahalitan sang mga mangingisda nga Pilipino.

Mas nagsingki ang bunggo-anay sang mga nagahari nga sahi pagkatapos nga mabuyagyag ang mga dalagko nga kaso sang korapsyon kaangot sa maanomaliya nga mga flood control project kag kontrata sa mga proyektong pang-imprastruktura. Naglupok ang kaakig sang pumuluyo sa binukid nga kwarta nga ginbulsa ni Marcos kag sang mga korap nga opisyal sang gobyerno.

Nagragasa sa bug-os nga pungsod ang malapad nga kahublagan protesta batuk sa korapsyon kag burukrata kapitalismo. Sa sulod sang duha ka bulan halin Septyembre, tayuyon ang mga walkout kag rali sang mga estudyante sa lain-lain nga kampus. Natukod ang mga malagpad nga alyansa sang mga pwersa kontra-korapsyon sa lain-lain nga sektor kag lugar, bisan pa may pila ka pwersa nga hungod nga ginapalayo ang kaakig sang pumuluyo kay Marcos.

Sa tunga sang pagtilaw nga tabunan ang papel sang Malacañang sa mga anomaliya paagi sa palagwaon nga “imbestigasyon,” ginbuyagyag sang mga imbolbado sa korapsyon nga mismo si Marcos ang utok kag nagbaton sang pinakadako nga kikbak sa ginatos ka bilyon ka piso nga proyektong pang-imprastruktura. Wala nagdugay, naglanog ang singgit para sa pagpapanaog ukon pagpalayas kay Marcos kag Duterte.

Ang kahublagan batuk sa korapsyon naglupok sa tunga sang padayon nga pagdalum sang krisis sa ekonomiya, pagsarurot sang kahimtangan sang malapad nga masa sang pumuluyo, kag wala-tuo nga mga programa kag tikang sang rehimen Marcos nga paantus sa pumuluyo.

Malapad ang disgusto sang pumuluyo sa atubang sang manubo nga sweldo sang mga mamumugon, kawad-on sang trabaho, halos semana nga pagsaka sang presyo sang lana, mataas nga sukot sa palpak nga mga serbisyo sa tubig, kuryente kag transportasyon, jeepney phaseout, pribatisasyon sang mga merkado, mapangwasak sa kapalibutan kag palangabuhian nga reklamasyon sa dagat, pagpang-agaw sang duta, pagpalayas sa mga mangunguma kag iban pa nga paantus. Peke ang ginasiling nga kalinong sa tunga sang masingki nga pagpang-ipit kag pagpaantus sa pumuluyo.

Lapnagon ang panawagan para sa ₱1,200 nga inadlaw nga minimum nga sweldo. Nangin matingkad ang pila ka welga sang mga mamumugon kag hublag sang lain-lain nga sektor sa lain-lain nga lugar para ipakigbato ang ila interes. Nagalapad kag nagadamo ang nagatindog batuk sa pasistang pagpangsumpo sang rehimen Marcos. Madamo ang napukaw sa pagwaragwag sang mga progresibong partido sang pungsodnon-demokratikong programa sang pagpakigbahin sa eleksyon. Ang pagpanikasog sa pag-organisa kag pagpahulag sa masa segurado nga matipon kag magabwelo sa mga maabot nga panahon.

Sa atubang sang madalum nga krisis kag mga masingki nga paghimakas, kag bunga sang kahublagan panadlong, tayuyon nga nagapabaskog ang Partido kag mga rebolusyonaryong pwersa. Tayuyon nga ginapasaka ang lebel sa teorya kag praktika paagi sa kahublagan pagtuon. Ginpalapnag sang Partido ang pagtuon sa burukrata kapitalista bilang giya sa paghangup sang pumuluyo sa nagtingkad nga hambalanon sang korapsyon.

Ginpabaskog ang mga likom nga rebolusyonaryong organisasyon masa sa kasyudaran sang mga mamumugon, mangunguma, pamatan-on, manunudlo, mga artista, syentista, mga doktor, nars kag mamumugon pang-ikaayong-lawas, tawong simbahan, mga migranteng Pilipino, kag iban pa nga sektor. Samtang nagapropaganda para sa demokratikong rebolusyon sang banwa, nagadamo ang nagadesisyon nga magpakigbahin sa armadong paghimakas kag rebolusyonaryong kahublagan mangunguma sa kaumhan.

Sa kaumhan, tayuyon nga nagasulong ang mga paghimakas mangunguma sa pagpangapin sang ila duta kag palangabuhian batuk sa mga nagapang-agaw, batuk sa paantus nga mga patakaran sang rehimen Marcos kag pasista nga pagpangsumpo sang mga armado nga mga gaway sini. Matingkad ang mga barikada kag iban pa nga dagway sang aksyon sa pila ka lugar. Ginapabaskog ang sanga kag komite sang Partido, ginatukod ang mga rebolusyonaryong organisasyon masa sang mga mangunguma, pamatan-on kag kababaehan, ang ila mga yunit milisya kag yunit pangdepensa sa kaugalingon, samtang nagapanikasog ang mga yunit sang Bagong Hukbong Bayan sa hilikuton masa kag pakig-away gerilya.

Sa pagpamuno kag kabulig sang Partido, tayuyon nga nagapalapad kag nagapadalum ang BHB sang baseng masa sang mangunguma. Angkon ang malapad sini nga suporta, kadam-an sang mga yunit sang BHB nakapreserba sang kusog sa pag-atubang sa wala puas nga mga operasyon kombat sang AFP. Nagadamo ang mga kadalag-an sa aktibo nga pagdepensa, taktikal nga opensiba kag pagsilot sa mga bat-ulan nga traidor kag pasista. Tayuyon ang pagpangrekrut kag paghanas sang mga bag-o nga Pulang hangaway kag kumander.

Sa atubang sang nagasingki nga krisis sang nagahari nga sistema, kag sa pundasyon sang kahublagan panadlong, ginapanan-aw sang Partido ang labi pa nga pagbaskog kag pagsulong sang demokratikong rebolusyon sang banwa sa maabot nga mga tuig. Determinado ang Partido nga pamunuan ang malapad nga masa sa pagsulong sang malawigon nga inaway banwa kag pag-agum sang mga kadalag-an sa bug-os nga pungsod.