Nagtingkad sining mga nagligad nga bulan ang lapnagon nga partisipasyon kag pakigbahin sang mga tawong simbahan, lider-relihiyoso kag layko sa mga demonstrasyon batuk sa grabe nga korapsyon sang rehimen Marcos. Bisan nagapabilin nga konserbatibo ang Simbahan, ang tingog kag tindog sini ang indi mabalewala nga naka-engganyo sa linibo ka nagpakigbahin sa kahublagan sang pumuluyo kontra-korapsyon.

Sa tunga sini ang rebolusyonaryong paghimakas sang mga myembro sang Christians for National Liberation (CNL) nga bag-as sang paghimakas sang pumuluyo nga mga Kristyano. Lakip ini sa mga ginpaambit nanday Ka Lila kag Ka Mingol, mga bag-ong pili nga opisyal sang CNL, sa pagpakig-estorya sang Ang Bayan.

Dako ang impluwensiya sang Simbahan kag iban pa nga relihiyosong grupo sa isa ka pungsod kaangay sang Pilipinas nga mayoriya Katoliko, pagpaambit ni Ka Mingol.

“Ginakabig sila nga tagpamaba sang hustisya kag kamatuoran,” siling nila. Nagapa-engganyo sa mga pamilya kag komunidad ang pagpakigbahin sang simbahan kag relihiyoso sa mga hublag protesta tungod talaksan sila sang moral legitimacy ukon pagka-matarong, sa mata sang madamo.

Suno naman kay Ka Lila, ginatudlo sa mga tawong simbahan kag tumuluo ang pagkabalaka para sa isigkatawo, ang pagkatampad sa pagbulig sa kada isa, agud maghulag para sa kamatuoran kag pagkatampad ilabi na sa atubang sang grabe nga pag-antus kag kalamidad. “Indi mabaton ang sistematiko nga pagpangawat sang rekurso nga dapat gintalana sa mga pinaka-nagakinahanglan,”

Apang sadtong Nobyembre 30, nagtingkad ang magkatuhay nga tindog sang Simbahan sa panawagan sang pumuluyo. Nakita ini sa nangin hulag sang Iglesia ni Cristo kag mga lider sang Catholic Bishop’s Conference of the Philippines. Sa mga higayon nga ini, nagpanawagan ang CNL nga wala-kompromiso nga manindugan kag maghulag santo sa hustisya, kamatuoran, kag pagkatampad, kag mag-guwa sa banggaan sang mga nagahari nga sahi kag mga pamilya nga nagabenepisyo sa burukrata-kapitalismo.

“Ang isyu sang korapsyon sa flood-control projects isa ka gamay nga bahin lang sang lapnagon kag sistematiko nga korapsyon sang reaksyonaryong gobyerno,” suno kay Ka Lila. Indi lang ini bahin sa banggaan sang pipila kundi tuhoy sa burukrata kapitalismo ukon pagpanghimulos nga nagakatabo sa pagpadalagan sang gobyerno bilang negosyo, ang paghugakom sang manggad sang mga yara sa poder.”

“Ginasikway sang CNL ang naratibo nga sa duha ka nagabanggaan nga kampo lang dapat matunga ang pagdampig, tungod pareho dapat manabat kaupod sang iban pa nga mga imbolbado sanday Marcos Jr kag Sara Duterte,” siling naman ni Ka Mingol.

Bisan magkatuhay ang mga ginahambal sang mga lider-simbahan tuhoy sa korapsyon, suno kay Ka Lila, maathag sa CNL ang lapnagon nga kaakig diri sang masang relihiyoso.

“Hangkat sa mga lider sang simbahan nga mangin huwaran sang pagkamapainubuson kag dayalogo,” pagpadayon ni Ka Mingol. Nagapanawagan man siya sa mga manubo nga lider – mga obispo, pari, pastor, ministro, kag mga lokal nga lider—nga indi mangin tigsunod lang sang opisyal nga linya, ilabi na kon lapas ini sa mga natun-an nila tuhoy sa hustisya.”Tigprotektar sila sang panong, indi tigpangapin sang gahum ukon maghipos sa atubang sang kalainan. Dapat nila hormahon ang konsensya sang pakighiusa agud makigbahin sang may panindugan indi lang bilang myembro sang bloke kundi bilang mga responsable nga mga indibidwal sang katilingban.”

Kaangay sang nagligad, tuman ka dako sang papel sang Simbahan sa pag-organisa kag pagpamuklat sa pumuluyo para sa hustisya kag pagbag-o sosyal, suno kay Ka Mingol. Malahalon nga wala-untat nga pabaskugon ang kubay para sa demokratikong rebolusyon sang banwa. Suno sa iya, determinado ang CNL nga pangibabawan kag madaog ang mga mabug-at nga hangkat sang konserbatismo, self-preservation (para sa pangkaugalingon nga interes) kag Red-tagging agud lab-uton ang bag-ong kapagsik sang pagpalapad sang kubay sang mga rebolusyonaryo sa mga tawong relihiyoso.

Ginapaathag sang CNL nga agud masikway ang burukrata kapitalismo, kinahanglan sang rebolusyonaryong paghulag. Isa ini sa nagapukaw kag nagahugpong sa balatyagon, ilabi na sang malapad nga kubay sang relihiyosong pamatan-on. Makita sa ila ang kapagsik sa pagpakigbahin sa mga hublag-protesta tubtob sa armadong paghimakas sa kaumhan. Ginakampanya sang CNL sa mga tawong-simbahan ang rebolusyonaryong programa sang National Democratic Front: ginapakita nga may alternatibo nga sistema sang pagdumala nga nagaserbe sa demokratikong interes sang masa.