Wala sang tupong ang pasista nga atake sang Operation Kagar sang reaksyonaryong estado sang India batuk sa masa kag rebolusyonaryong kahublagan Indian sang nagligad nga halos duha ka tuig. Sa atubang sini, nagapanikasog ang Communist Party of India (Maoist), ang People’s Liberation Guerrilla Army (PLGA), kag bug-os nga rebolusyonaryong kahublagan sang India nga paslawon ang deklarado nga katuyuan sang Kagar nga tapuson kag lutoson ang pakig-away sang pumuluyo sa Marso 2026.

Sugod sang ginpatuman sadtong Enero 2024 ang Operation Kagar, maisog ini nga ginpakig-awayan sang PLGA. Sa pihak sang tuman ka dako nga pwersang pangdumog kag pangpapas sang rehimen Modi, pagtuhaw sang mga kampo militar kag kampanyang likidasyon sa pamunuan sang Partido, nakalunsar sang mga armadong aksyon ang gerilyang hukbo.

Sang nagligad nga tuig, naglab-ot sa 116 ang napatay kag 208 ang napilasan sa pwersa sang pulis kag soldado sa mga armadong aksyon sang PLGA. Gintarget man sini ang mga masupog nga impormer sang pulis kag militar kag mga bat-ulan nga lider sang Bharatiya Janata Party, nagahari nga partido sa India. Mayor nga nagagamit sang mga pangbomba ang hukbo sa mga operasyon sini. Kag sa pila ka higayon, naggamit ang PLGA sang mga tumandok nga armas kasubong sang mga tugalbong nga suyak.

Apang, tampad nga ginpahayag sang CPI (Maoist) nga nagaagum ini sang mga grabe nga kalutosan sa nagligad nga tuig. Siling sini, bunga ang mga kalutosan sang pangsulod nga mga kahuyangan, kapaslawan nga ipatuman ang mga plano sang Komite Sentral kag ginpasingki nga atake sang estado.

Halin Disyembre 2024 tubtob Nobyembre subong nga tuig, naglab-ot sa 320 ang mga rebolusyonaryo nga namartir kon diin 117 kababaehan. Indi magnubo sa 237 sa ila myembro sang Partido. Walo ang sa lebel Komite Sentral, lakip ang heneral nga sekretaryo sang Partido nga si Kasamang Basavaraju, 15 ang lebel komite sang estado, 25 ang lebel distrito, kag 73 ang lebel komite sa erya. May 13 halin sa PLGA kag 33 mga kadre kag aktibista sang organisasyon masa.

Para makabawi sang kusog, nagpanawagan ang CPI (Maoist) nga paigtingon ang pakig-away sa Operation Kagar sa bug-os nga pungsod. Ginaduso sang Partido nga tumuron kag tadlungon ang nangin mga kasaypanan sa nagligad nga 22 ka bulan para mapunggan ang labi pa nga mga kalutosan. Dapat man kuno nga tun-an kag analisahon ang obhetibo nga kahimtangan kag suhetibong pwersa sa kada erya para liwat papagsikon ang Partido, makonsolida ang PLGA kag ang mga organisasyon masa.

Isa sa mga nauna nga natumod sang partido nga kasaypanan sini, ilabina sa inaway banwa, amo ang pagpakitid sa kaugalingon sa pagpagamay sang erya nga ginahulagan. Siling sini, dapat maghulag sa mas malagpad nga sakop ang hukbo kag indi magpabilin nga sentralisado. Partikular nga halimbawa sini ang kapaslawan nga balhinon ang tropa sang PLGA halin sa rehiyon Dandakaranya, nga episentro sang Operation Kagar, padulong sa iban nga rehiyon.

Magluwas diri, ginlahad man sang Partido ang kakinahanglanon nga ibuyagyag, sikwayon kag awayon ang mga traidor sa rebolusyon. Pinakabantog sa mga traidor nga ini sanday Sonu (Mallojula Venugopal Rao), anay myembro sang Departamento sa Pulitika sang CPI (Maoist), kag Satish (Takkallapalli Vasudeva Rao) nga aktibo na nga nagapagamit subong sa rehimen Modi. Nagsungka sila sadtong Oktobre, kag nag-engganyo sang iban pa sadtong Nobyembre. Naglab-ot sa 299 ka indibidwal ang naganoy sang hubon kag nagsungka sang indi magnubo sa 277 ka armas sang PLGA kag Partido.

“Sa panahon nga ini, katungdanan naton nga kakason ang kahadlok kag kahangawa sa aton kubay, magpakita sang kaisog kag pabaskugon ang kumpyansa sang aton Partido,” suno sa CPI (Maoist). Dugang sini, sa kagrabehon sang krisis sa pungsod mas nga nagaathag subong ang kakinahanglanon nga pamunuan sang Partido ang pangkabug-osan nga makasahi nga paghimakas sang masang Indian agud pukanon ang paghari sang mga imperyalista, mga dalagko nga kumprador, kag mga agalon mayduta.

Pagpakita sang determinasyon nga magsulong sang rebolusyonaryong kahublagan sang India ang pagsaulog sini sang ika-25 nga anibersaryo sang PLGA sadtong Disyembre 2. Sa Semana sang Pagsaulog halin Disyembre 2-8, ginlunsar sa kabukiran, kapatagan, kag sentrong urban, ang mga pulong sang grupo kag magagmay nga pagtililipon. Nagpatapik kag nagpanagtag ang mga rebolusyonaryo sang mga poster kag polyeto para ipanawagan ang pagpabaskog kag pagpatapo sa PLGA. Ginlunsar ini nga may hugot nga paghalong kag pagprayoridad sa seguridad tungod sa ginpasingki nga atake sang estado.