Nagtipon ang masobra 20 ka myembro sang tsapter sang Makabayang Samahang Pangkalusugan-National Capital Region (MSP-NCR) sa isa ka sekreto nga lugar sadtong Disyembre 6 agud ilunsar ang ila pangrehiyon nga asembliya. Nagtambong diri ang mga mamumugon pang-ikaayong-lawas sa ospital, nars, doktor, medical technologist, dentista, kag mga estudyante sa medisina kag pagka-nars.

Ang asembliya gintuon sang MSP-NCR sa pagdumdom sa ika-47 nga anibersaryo halin sang gintukod ini sadtong Disyembre 6, 1978.

Sa pagtipon, ginpalig-on sang MSP-NCR ang panindugan para sa demokratikong rebolusyon sang banwa sa atubang sang sobra-sobra nga pag-antus sang pumuluyong Pilipino. Suno diri, malahalon nga isahon ang kusog sang sektor pang-ikaayong-lawas sa paghimakas sang pumuluyo para sa pagpasulong sang rebolusyon.

Nahimo man sa asembliya ang 5-punto nga resolusyon para sa pagpabaskog sang paghimakas sini. Ginpaguwa ang resolusyon sa ginbantala nga ispesyal nga isyu sang pahayagan Ang Rebolusyonaryong Lunas.

Suno sa tsapter, malahalon nga okasyon ang pagtipon para sa konsolidasyon sang katapuan sang MSP. Naghatag ini sang ligwa para makapaambit ang mga myembro sang rebolusyonaryong eksperyensiya sa pag-organisa kag eksperyensiya sa paghatag-serbisyo sang MSP nga nagsabat sa panawagan nga magkadto sa kaumhan. Dugang sini, malahalon man nga tikang ang asembliya sa paghanda sa labi pa nga konsolidasyon sang MSP sa pungsodnon nga sakop.