Nagdeklarar sang apat ka adlaw nga untat-lupok ang Partido Komunista ng Pilipinas (PKP) bilang pagpakig-isa sa mga tradisyunal nga pagsaulog sang masang Pilipino. Ginmanduan sang Komite Sentral sang Partido ang Bagong Hukbong Bayan (BHB) nga ipatuman ini halin 00:00 sang aga sang Disyembre 25 tubtob 23:59 sang gab-i sang Disyembre 26 kag halin 00:00 sang aga sang Disyembre 31 tubtob 23:59 sang gab-i sang Enero 1, 2026.

Suno sa pamunuan sang Partido, paghatag ligwa ang untat-lupok sa mga simple nga pagsaulog sang mga Pilipino sa atubang sang malala nga sosyal nga kahimtangan kag pang-ekonomiya sa idalum sang rehimen Marcos. Higayon man ini sang rebolusyonaryong kahublagan, kaupod ang pumuluyo, agud saulogon ang ika-57 nga anibersaryo sang Partido sa Disyembre 26.

Sa pagpatuman sang untat-lupok, ginmanduan sang Komite Sentral ang mga yunit sang BHB nga aktibo nga magdepensa ilabi na sa atubang sang pagpanalasa sang wala-untat nga mga operasyon kombat sang Armed Forces of the Philippines (AFP). Dapat kuno hugot nga makigbuligay ang mga yunit sang BHB sa masa para mapatuman ini. “Dapat man sila nga pirme nga handa nga magmaniobra ukon maglunsar sang kontra-atake sa panahon nga kinahanglanon sang kahimtangan,” suno sa Komite Sentral.

Gilayon nga gin-kontra sang AFP kag Department of National Defense ang isa ka bahin nga untat-lupok sang Partido kag hukbo sang banwa. Suno sa Partido, ang pahayag nga ini sang mga tinawo sang rehimen Marcos nagapamatuod sa uhaw-sa-dugo nga kinaiya sang iya armadong pwersa kag plano nga gamuhon ang malinong nga mga pagsaulog sang masang Pilipino.

“Wala sang iban nga luyag nga iregalo si Marcos sa pumuluyo sa maabot nga mga tradisyunal nga pagsaulog kundi bala kag bomba sa pagmando sini sa AFP kag mga pulis nga maglunsar sang wala-untat nga mga operasyon kombat sa kaumhan,” suno kay Marco Valbuena, opisyal sa impormasyon sang Partido.

Samtang, ginbatikos sang Partido ang ginapalapnag sang Philippine Army nga paglapas sang BHB sa untat-lupok sa inaway nga natabo sa Northern Samar sadtong Disyembre 15, bisan pa nga indi pa ini sakop sang deklarasyon.