Nagdeklara han upat kaadlaw nga ukoy-bubto an Partido Komunista ng Pilipinas (PKP) komo pakig-usa ha mga tradisyunal nga pagselebrar han masa nga Pilipino. Ginmanduan han Komite Sentral an Bagong Hukbong Bayan (BHB) nga ipatuman ini tikang 00:00 han aga han Disyembre 25 tubtub 23:59 han gab-i han Disyembre 26 ngan tikang 00:00 han aga han Disyembre 31 tubtub 23:59 han gab-i han Enero 1, 2026.

Sigon ha pamunuan han Partido, paghatag-wada an ukoy-bubto ha mga simple nga pagselebrar han mga Pilipino atubangan han grabe nga pankatilingban ngan pan-ekonomiya nga kamutangan ha ilarum han rehimen Marcos. Higayon liwat ini han mga rebolusyunaryo nga kagiusan, kaupod an katawhan, para igselebrar an ika-57 nga anibersaryo han Partido ha Disyembre 26.

Ha pagpapatuman han ukoy-bubto, ginmanduan han Komite Sental an mga yunit han BHB nga mag-aktibo nga depensa labina ha atubangan han panlalasurbo han waray hunong nga mga pankombat nga operasyon han Armed Forces of the Philippines (AFP). Kinahanglan kuno mahugot nga makigbuligay an mga yunit han BHB ha masa para mahipatuman ini. “Kinahanglan liwat hira pirme andam nga magmaniobra o maglansar han kontra-atake ha panahon nga ginkikinahanglan han kamutangan,” sigon ha Komite Sentral.

Layon nga ginkontra han AFP ngan Department of National De-fense an unilateral nga ukoy-bubto han Partido ngan hukbo han katawhan. Sigon ha Partido, ini nga pahayag han mga tawuhan han rehimen Marcos nagpapamatuod ha uhaw-ha-dugo nga kinaiya han iya armado nga pwersa ngan larang nga istorbohon an mamurayaw nga pagsalin-urog han masa nga Pilipino.

“Waray iba nga karuyag igregalo hi Marcos ha katawhan ha tiarabot nga mga tradisyunal nga selebrasyon kundi bala ngan bomba ha pagmamando hini ha AFP ngan mga pulis nga maglansar han waray hunong nga mga operasyon kombat ha kabaryuhan,” sigon kan Marco Valbuena, upisyal ha impormasyon han Partido.

Samtang, ginsukna han Partido an iginpapasarang han Philippine Army ha pagtalapas han BHB ha ukuy-bubto ha agway nga nahibato ha Northern Samar hadton Disyembre 15, bisan kun diri pa ini lupgop han deklarasyon.