Ginhandum han pamilya, kasangkayan, mga kasama, partido ngan organisasyon ha magkalain-lain nga parte han kalibutan an ikatulo nga anibersaryo han pagkamatay ni Kasamang Jose Maria Sison hadton Disyembre 16. Ha Pilipinas ngan the Netherlands, naglansar hin mga aktibidad komo paghinumdom kan Ka Joma.

Ha the Netherlands, ginpasalida an pelikula-dokumentaryo nga My Friend the Terrorist hadton Disyembre 13. Ginpangunahan an aktibidad han Jose Maria Sison Legacy Foundation, Friends of the Filipino People in Struggle ngan lokal nga organisasyon hini nga Maya Solidarity.

Ha Pilipinas, ginhalad kan Ka Joma han usa nga sanga han Partido Komunista ng Pilipinas ha Rizal an ginlansar hini nga pag-aram ha Batakan nga Kurso han Partido hadton Disyembre 16.

Ha Quezon City, ginpasidunggan hi Ka Joma han mga tsapter han Artista at Manunulat ng Sambayanan ha ginpangunahan hini nga idlap nga rali ha University of the Philippines-Diliman hadton Disyembre 17. Ginhimo ini ha butnga han Lantern Parade, an tinuig nga parada han mga parol ha kampus nga ginkakadto han yukut-yukot nga magkurulaw.

Labot hini, ginpalandaw liwat ha rali an tiarabot nga ika-57 nga anibersaryo han Partido ha Disyembre 26 ngan an panawagan ha katawhan Pilipino, labina ha mga kabatan-unan, nga pumartisipar ha gerra han katawhan ngan umapi ha Bagong Hukbong Bayan.