Dugang nga nagpintas hini nga naglabay nga tuig 2025 an krisis ha ekonomiya ngan pulitika han naghahadi nga sistema, mas naggrabe an panginginlabot militar han imperyalismo nga US ngan naggrabe an pankatilingban nga kamuntangan han mayoriya han katawhan. Kadungan hini, nagpintas an mga pakigbisog kontra ha korapsyon ngan pasismo han rehimen US-Marcos.

Nagin butaray an sumpakiay han mga naghahadi nga klase, partikular an banggaay han magkaribal nga barkadahan nga Marcos ngan Duterte. Iginsalawad ha House of Representatives hadton Pebrero an kaso nga impeachment kontra kan Sara Duterte, kundi napiliw an kaso han ulangon mismo ni Ferdinand Marcos Jr an pagbista ha Senado. Hadton Marso, nakigbuligay hi Marcos ha Interpol ha pag-aresto ngan pagpriso ha The Netherlands ha hadto anay presidente nga hi Rodrigo Duterte subay ha mandamyento han International Criminal Court. Didto hiya bibistahon ha mga krimen ha katawhan tungod ha tinagdamo nga pagpatay ha “war on drugs.”

Ginhimo hadton Mayo an eleksyon ha senado, kongreso ngan lokal nga gubyerno. Butaray an panlibo ngan manipulasyon an resulta. Gin-espiho hini an sumpakiay ngan akomodasyon han magkalain-lain nga barkadahan han naghahadi nga klase, ngan panginginlabot han imperyalismo nga US. Samtang nagpapabilin nga bug-os an suporta han US kan Marcos, iginpupwesto na gihap hini an iya mga reserba nga kabayo para ha pagdalagan ha 2028.

Waray katupong an panginginlabot militar han US ha bug-os nga tuig. Ha pakikigkunsabuhay ha rehimen Marcos ngan gamit an Armed Forces of the Philippines (AFP), gin-abrihan an bag-o nga mga base ngan panmilitar nga pasilidad. Nag-istak an US han kadugangan nga mga higamit pan-gerra ha Pilipinas. Waray hunong nga iginlansar an mapanulsol nga mga panmilitar nga ehersisyo ha sakob ngan palibot han South China Sea, ha kahibangan han mga parupangisda nga Pilipino.

Dugang nga nagpintas an banggaay han mga naghahadi nga klase kahuman mabuksas an dagko nga kaso han korapsyon kasumpay han maanomaliya nga mga flood control project ngan kontrata ha mga proyekto nga pan-imprastraktura. Binuto an kangalas han katawhan ha malabukid nga kwarta nga iginbubursa ni Marcos ngan han mga korap nga upisyal han gubyerno.

Nagrabunos ha bug-os nga nasud an hiluag nga kagiusan protesta kontra ha korapsyon ngan burukrata kapitalismo. Sakob han duha kabulan tikang Septyembre, dirudiretso an mga walkout ngan rali han mga estudyante ha magkalain-lain nga kampus. Nabug-os an higlapad nga alyansa han mga pwersa nga kontra-koraps-yon ha magkalain-lain nga sektor ngan lugar, bisan pa mayda pira nga pwersa nga tinuyo nga ighirayo an kangalas han katawhan kan Marcos.

Ha butnga han pag-aatentar nga tahuban an papel han Malacañang ha mga anomaliya pinaagi han pasalida nga “imbestigasyon,” iginbuksas han mga dabi ha korapsyon nga hi Marcos mismo an utok ngan kinarawat han pinakadako nga kikbak ha gatus-gatus kabilyon piso nga mga proyekto nga pan-imprastraktura. Waray pag-iha, nag-aningal an guliat para ha pagpaparesayn o pagpapatalsik kan Marcos ngan Duterte.

An kagiusan kontra korapsyon naglarab ha butnga han padayon nga paghilarum han krisis ha ekonomiya, pagluros han kamutangan han hiluag nga masa han katawhan, ngan wala-tuo nga mga programa ngan pitad han rehimen Marcos nga pakuri ha nasud.

Hiluag an pagdumiri han katawhan atubangan han himubo nga suhol han mga trabahador, kawaray hin trabaho, haros sinemana nga paghitaas han presyo han lana, hitaas nga sukot ha palpak nga serbisyo ha tubig, kuryente ngan transportasyon, jeepney phaseout, pribatisasyon han mga merkado, mapanwakay ha kalibungan ngan pakabuhian nga reklamasyon ha dagat, panlulupot ha tuna, pagpapaiwas ha mga parag-uma ngan iba pa nga pakuri. Buwa an ginsesering nga kamurayawan ha butnga han grabe nga panmuypoy ngan pagpapakuri ha katawhan.

Hiluag an panawagan para ha ₱1,200 nga inadlaw nga minimum nga suhol. Nagin landaw an pira nga welga han mga trabahador ngan paggios han magkalain-lain nga sektor ha magkalain-lain nga lugar agud ipakigbisog an ira kaupayan. Tikahiluag ngan tikadamo an nagtitikapintas nga pag-ato ha pasista nga pandarahug han rehimen Marcos. Damo an napukaw ha pagpapalandaw han mga progresibo nga partido ha nasyunal-demokratiko nga program ha pagpartisipar ha eleksyon. An pagpupursige ha pag-oorganisa ngan pagpapagios ha masa piho nga matitirok ngan mabuylo ha mga tiarabot nga panahon.

Atubangan han hilarum nga krisis ngan magpintas nga pakigbisog, ngan bunga han kagiusan pagtutul-id, dirudiretso nga nakakapagpakusog an Partido ngan mga rebolusyunaryo nga pwersa. Dirudiretso nga igin-iisa an balitang han teorya ngan praktika pinaagi han kagiusan pag-aram. Ginpapasamwak han Partido an pag-aram ha burukrata kapitalismo komo giya ha pagsantop han katawhan ha linandaw nga isyu han korapsyon.

Ginpapakusog an mga sikreto nga rebolusyunaryo nga organisasyon masa ha kasyudaran han mga trabahador, parag-uma, kabatan-unan, magturutdo, artista, siyentista, mga doktor, nars ngan trabahador pankalibsugan, tawo ha singbahan, mga migrante nga Pilipino, ngan iba pa nga mga sektor. Samtang nagpopropaganda para ha demokratiko nga rebolusyon han katawhan, tikadamo an nagdedesisyon nga magpartisipar ha armado nga pakig-away ngan rebolusyunaryo nga kagiusan parag-uma ha kabaryuhan.

Ha kabaryuhan, dirudiretso nga naabante an mga pakigbisog han parag-uma ha pagdepensa han ira tuna ngan pakabuhian kontra ha mga parupanlupot, kontra ha pakuri nga mga palisiya han rehimen Marcos ngan pasista nga pandarahug han mga armado nga alipures hini. Landaw an mga barikada ngan iba nga porma han paggios ha pira nga lugar. Ginpapakusog an mga sanga ngan komite han Partido, ginbubug-os an mga rebolusyunaryo nga panmasa nga asosasyon han mga parag-uma, kabatan-unan ngan kababayin-an, an ira mga yunit milisya ngan yunit ha pagdepensa-ha-kalugaringon, samtang nagpupursige an mga yunit han Bagong Hukbong Bayan ha buruhaton masa ngan ginerilya nga pakiggerra.

Ha pamumuno ngan kabakyang han Partido, dirudiretso an BHB ha pagpapahiluag ngan pagpapahilarum han base panmasa han parag-uma. Angkon an hiluag hini nga suporta, kadam-an han mga yunit han BHB nakapagpreserbar han kusog ha pag-atubang ha waray hunong nga mga pankombat nga operasyon han AFP. Tikadamo an mga kadaugan ha aktibo nga depensa, taktikal nga opensiba ngan pagsirot ha mga lunod-patay nga traydor ngan pasista. Dirudiretso an mga pagrerekrut ngan pagpapahiara han mga bag-o nga Pula nga mangaraway ngan kumander.

Ha atubangan han natikahilarum nga krisis han naghahadi nga sistema, ngan ha pundasyon han kagiusan pagtutul-id, nakatan-aw an Partido ha mas pagpapakusog ngan pagpasulong han demokratiko nga rebolusyon han katawhan ha tiarabot nga mga tuig. Determinado an Partido nga pamunuan an hiluag nga masa ha pagpapasulong han panmaihaan nga gerra han katawhan ngan pagkab-ot han mga kadaugan ha bug-os nga nasud.