Nakig-usa an mga Pilipino ha paghandum ha ika-77 nga Internasyunal nga Adlaw han Tawhanon nga Katungod hadton Disyembre 10. Ha magkalain-lain nga parte han nasud, yukut-yukot an nagmartsa agud ig-undong an tawhanon nga katungod ngan suknaon an rehimen Marcos ha waray wantas nga pagtalapas hini ha katungod han katawhan.

Ginpangunahan han Karapatan ngan Bagong Alyansang Makabayan (Bayan) an mga paggios ha Manila ngan 15 nga syudad ngan prubinsya. Nagpahayag han suporta ha paggios an International Coalition for Human Rights in the Philippines.

Ha Manila, yukut-yukot an pinartisipar ha katitirok ngan programa ha Liwasang Bonifacio ngan ha martsa tipakadto ha Mendiola. Labot ha mga organisasyon nga nakabase ha National Capital Region, nakig-usa ha protesta an mga grupo nga tikang ha Southern Tagalog. Nagkakaurusa nga panawagan nira: “Tapuson an pasista, korap, ngan pakuri nga rehimen US-Marcos Jr!”

Hadton Mayo 2025, pormal nga ginpatuman han rehimen Marcos an National Action Plan for Unity, Peace, and Development 2025-2028. Nagserbe ini nga balayan han ginpagrabe nga pampulitika nga panmuypoy ha katawhan. Prinsipal ini nga ginpapatuman han National Task Force-Elcac.

Ha lista han Karapatan, diri mamenos ha 11 kamilyon nga Pilipino an nagin biktima han pagtalapas ha tawhanon nga katungod han mga pwersa han estado ilarum han rehimen Marcos. Kaupod ha ira an mga biktima han ekstra-hudisyal nga pagpatay, pwersahay nga pagkawara, arbitraryo nga pag-aresto, pwersahay o buwa nga pagpasurender, waray wantas nga panmusil ngan panmomba, pwersahay nga pagpaebakwet ngan pananarhug, pansamok ngan panhadlok, kalakip an Red-tagging.

Nagpapabilin nga nakapriso an diri mamenos ha 696 nga priso pulitikal, 163 gin-aresto ilarum ni Marcos. Ha mga priso pulitikal, 136 an kababayin-an, 93 an lagas na, ngan 89 an masakit. Mayda liwat nakapriso nga 12 nga konsultant ngan istap han National Democratic Front of the Philippines para ha negosasyon nga pankamurayawan.

Ha paghuhuman han protesta ha Mendiola, ginsunog han mga grupo an effigy nira Marcos ngan Sara Duterte nga ginladawan komo hadi ngan reyna han pasismo ngan korapsyon. Ginpakita han effigy nga may dara-dara nga armalayt hira Marcos ngan Duterte samtang nakalingkod ha mga maleta nga simbolo han korapsyon.

Kapareho nga mga protesta ngan aktibidad an ginlansar ha Baguio City, Tabuk City ha Kalinga, Mountain Province, Laoag City ha Ilocos Norte, Tarlac, Nueva Ecija, Bulacan, Legazpi City ha Albay, Naga City ha Camarines Sur, Iloilo City, Kalibo City ha Aklan, Roxas City ha Capiz, Bacolod City, Cebu City, ngan Davao City.

Pag-undong ha tawhanon nga katungod han singbahan ngan mga magbaralaud

Tikang pa ha panahon han hadto anay rehimen Duterte, pinakamadugo an rekord han estado ha pagtalapas ha tawhanon nga katungod ha Mindanao. Pinakagrabe ini han ig-imponer an balaud militar tikang Mayo 2017 tubtub 2019.

Hadton Disyembre 9-10, ginlansar ha Davao City an Mindanao Human Rights Summit. Gintambungan ini han 242 nga delegado tikang ha singbahan, sugad liwat han mga abugado, tagdepensa han tawhanon nga katungod ngan organisasyon masa han Mindanao.

Ha ikaduha nga adlaw han aktibidad, ginhimo an pankabug-usan nga asembleya ngan paglalansar ha Pakighiusa sa Anawim-Mindanao (Panaw-Mindanaw). An bag-o nga tukod nga grupo usa nga organisasyon nga tuyo nga tagan hin tingog ngan hustisya an mga biktima han mga pagtalapas ha tawhanon nga katungod ha Mindanao.

Ha Kongreso, utro nga ginlansar an Mambabatas para sa Karapatang Pantao o Makatao Coalition hadton Disyembre 9. Katuyuanan han koalisyon nga igpasulong an mga balaud nga magdedepensa ha tawhanon nga katungod. Syahan ini nga ginbug-os han mga magbaralaud, kaupod an Makabayan Bloc, hadton 2018 agud tipahan an mga ekstra-hudisyal nga panmatay han hadto anay rehimen Duterte. Ginpapamunuan ini yana ni Rep. Leila de Lima.