Linandaw hini nga mga nakalabay nga bulan an hiluagan nga partisipasyon ngan pagpartisipar han mga tawo ha singbahan, lider-relihiyoso ngan layko ha mga demonstrasyon kontra ha grabe nga korapsyon han rehimen Marcos. Bisan kun nagpapabilin nga konserbatibo an Singbahan, an tingog ngan tindog hini an usa ha diri madidiwara nga nakakaaghat ha yukut-yukot nga magpartisipar ha kagiusan han katawhan kontra-korapsyon.

Ha butnga hini an rebolusyunaryo nga pakigbisog han mga membro han Christians for National Liberation (CNL) nga rubas han pakigbisog han katawhan han mga Kristyano. Kalakip ini ha mga iginpasaro nira Ka Lila ngan Ka Mingol, mga bag-o nga naeleher nga upisyal han CNL, ha interbyu han Ang Bayan.

Dako an impluwensya han Singbahan ngan iba pa nga relihiyoso nga grupo ha usa nga nasud sugad han Pilipinas nga mayoriya Katoliko, pagpasaro ni Ka Mingol.

“Iginkokonsidera hira nga tagapagyakan han hustisya ngan kamatuoran,” sering niya. Maka-eengganyar ha mga pamilya ngan komunidad an pagpartisipar han singbahan ngan relihiyoso ha mga gios protesta tungod kay suklanan hira han moral legitimacy o pagin tadong, ha mata han kadam-an.

Sigon kan Ka Lila, igintututdo ha mga tawo ha singbahan ngan paragtuo an paghigugma para ha igkasi, an pagin tangkod ha pagbulig ha kada tagsa, agud gumios para ha kamatuoran ngan katangkuran labina atubangan han grabe nga kakurian ngan kalamidad. “Diri makarukarawat an sistematiko nga pangawat han rekurso nga kinahanglan igin-aalutaga ha mga pinaka-nanginginahanglan,” sering niya.

Kundi hadton Nobyembre 30, linandaw an magkalain-lain nga tindog han Singbahan ha panawagan han katawhan. Nakit-an ini ha nagin gios han Iglesia ni Cristo ngan mga lider han Catholic Bishop’s Conference of the Philippines. Hito nga mga higayon, nanawagan an CNL nga waray-kompromiso nga manindugan ngan gumios subay ha hustisya, kamatuoran, ngan katangkuran, ngan umalinggawas ha bangaay han mga naghahadi nga klase ngan mga pamilya nga nagpupulos ha burukrata kapitalismo.

“An isyu han korapsyon ha flood-control projects usa nga guti nga parte la ha hiluagan ngan sistematiko nga korapsyon han reaksyunaryo nga gubyerno,” sigon kan Ka Lila. Diri la ini hiunong ha tipa-tipa han pipira kundi hiunong ha burukrata kapitalismo o paniniyupi nga nahitatabo ha pagpapadalagan ha gubyerno komo negosyo, an paghakin han karikuhan han mga aada ha poder.”

“Ginpapara han CNL an naratibo nga ha duha nga nagbabanggaay nga kampo la kinahanglan matunga an paggapil, tungod kay ngaduha kinahanglan mapagbaton kaupod an iba pa nga mga nadadabi hira Marcos Jr ngan Sara Duterte,” sering naman ni Ka Mingol.

Bisan kun nag-iiriba an ginsesering han mga lider han singbahan hiunong ha korapsyon, sigon kan Ka Lila, klarado ha CNL an hiluagan nga kangalas dinhi han masa nga relihiyoso.

“Ayat ha mga lider han singbahan nga magin susbaranan han pagin mapainubsanon ngan dayalogo,” pagpapadayon ni Ka Mingol. Nananawagan liwat hiya ha mga uruubos nga lider—mga obispo, padi, pastor, ministro, ngan mga lokal nga lider—nga diri magin tagasunod la han upisyal nga linya, labina kun talapas ini ha mga nahibaruan nira hiunong ha hustisya. “Tagdepensa hira han kadam-an, diri tagdepensa han poder o kamingawan atubangan han karat-an. Kinahanglan nira moldehon an konsensya han kaapihan agud magpartisipar hin may panindugan diri la komo membro han bloke kundi komo mga responsable nga indibidwal han katilingban.”

Kapareho ha naglabay, dako kaupay an papel han Singbahan ha pag-oorganisa ngan pagpupukaw ha katawhan para ha hustisya ngan pankatilingban nga pagbabag-o, sigon kan Ka Mingol. Importante nga waray hunong nga pakusgon an ranggo para ha demokratiko nga rebolusyon han katawhan. Sering niya, determinado an CNL nga maungbawan ngan mahidaug an mga grabe nga ayat han konserbatismo, self-preservation (para ha kalugaringon nga interes) ngan Red-tagging agud kab-uton an bag-o nga rayhak han pagpapahiluag han mga rebolusyunaryo ha mga tawo nga relihiyoso.

Iginpapasantop han CNL nga agud mahisalikway an burukrata kapitalismo, kinahanglan han rebolusyunaryo nga paggios. Usa ini ha nagpupukaw ngan nag-uurusa han kaburut-on, labina ha hiluag nga ranggo han relihiyoso nga kabatan-unan. Ginkikit-an hira han rayhak ha pagpartisipar ha mga gios protesta tubtub ha armado nga pakig-away ha kabaryuhan. Iginkakampanya han CNL ha mga tawo ha singbahan an rebolusyunaryo nga programa han National Democratic Front: iginpapakita nga mayda alternatibo nga sistema han panggubyernuhan nga nagseserbe ha demokratiko nga interes han masa.