Waray katupong an pasista nga atake han Operation Kagar han reaksyunaryo nga estado han India kontra ha masa ngan rebolusyunaryo nga kagiusan nga Indian ha naglabay nga haros duha katuig. Atubangan hini, nagpupursige an Communist Party of India (Maoist), an People’s Liberation Guerrilla Army (PLGA), ngan bug-os nga rebolusyunaryo nga kagiusan han India nga pakyason an deklarado nga katuyuanan han Kagar nga tapuson ngan perdihon an pag-ato han katawhan ha Marso 2026.

Tikang han igpatuman hadton Enero 2024 an Operation Kagar, mabayanihon ini nga gin-atuhan han PLGA. Ha luyo han ura-ura kadako nga pwersa nga pandúmog ngan pag-ensirkulo han rehimen Modi, pag-ulpot han mga kampo militar ngan kampanya nga likidasyon ha pamunuan han Partido, nakapaglansar hin mga armado nga aksyon an gerilya nga hukbo.

Ha naglabay nga tuig, inabot ha 116 an napatay ngan 208 an nasamaran ha pwersa han pulis ngan sundalo ha mga armado nga aksyon han PLGA. Gintarget liwat hini an mga lunod-patay nga impormer han pulis ngan militar ngan mga tampalasan nga lider han Bharatiya Janata Party, naghahadi nga partido ha India. Prinsipal nga gumamit hin mga bomba an hukbo hini nga mga operasyon. Ngan ha pira nga higayon, gumamit an PLGA hin mga katutubo nga armas sugad han mga lit-ag nga suyak.

Sugadman, tangkod nga ginpahayag han CPI (Maoist) nga nahiagum ini hin mga grabe nga kaperdihan ha naglabay nga tuig. Sering hini, bunga an mga kaperdihan han pansakob nga mga kaluyahan, kapakyasan nga igpatuman an mga plano han Komite Sentral ngan ginpagrabe nga atake han estado.

Tikang Disyembre 2024 tubtub Nobyembre yana nga tuig, inabot ha 320 nga mga rebolusyunaryo an namartir diin 117 kababayin-an. Diri mamenos ha 237 ha ira membro han Partido. Walo an aada ha lebel han Komite Sentral, kaupod an pankabug-usan nga sekretaryo han Partido nga hi Kasamang Basavaraju, 15 an aada ha lebel han komite han estado, 25 an lebel han distrito, ngan 73 an lebel han komite ha erya. Mayda 13 tikang ha PLGA ngan 33 nga mga kadre ngan aktibista han organisasyon masa.

Agud makabawi han kusog, nanawagan an CPI (Maoist) nga papintason an pag-ato ha Operation Kagar ha bug-os nga nasud. Ginduduso han Partido nga tudlukon ngan igtul-id an nagin mga kasaypanan ha naglabay nga 22 kabulan para mapugngan an dugang pa nga mga kaperdihan. Kinahanglan liwat kuno adman ngan analisaron an obhetibo nga kamutangan ngan suhetibo nga pwersa ha kada erya agud utro nga parayhakon an Partido, makonsolida an PLGA ngan an mga organisasyon masa.

Usa ha mga nahiuna nga natudlok han Partido nga kasaypanan hini, labina ha gerra han katawhan, amo an pagpapahaligot ha kalugaringon ha tikaguti nga erya nga nagigiusan. Sering hini, kinahanglan gumios ha mas higlapad nga lupgop an hukbo ngan diri magpabilin nga sentralisado. Partikular nga pananglitan hini an kapakyasan nga magbalhin han tropa han PLGA tikang ha rehiyon nga Dandakaranya, nga episentro han Operation Kagar, ngadto ha iba nga rehiyon.

Labot dinhi, ginpahayag liwat han Partido an panginahanglan nga ibuksas, igsalikway ngan makigsumpaki ha mga traydor ha rebolusyon. Pinakalanong hini nga mga traydor hira Sonu (Mallojula Venugopal Rao), hadto anay membro han Byuro ha Pulitika han CPI (Maoist), ngan Satish (Takkallapalli Vasudeva Rao) nga aktibo na nga nagpapagamit yana ha rehimen Modi. Sinurender hira hadton Oktubre, ngan nag-aghat hin iba pa hadton Nobyembre. Inabot ha 299 nga indibidwal an nadanas han grupo ngan nagsurender han diri mamenos ha 277 nga armas han PLGA ngan Partido.

“Hini nga panahon, responsabilidad naton nga kumbatihon an kahadlok ngan kabaraka ha aton ranggo, magpakita han kaisog ngan pakusgon an kumpyansa han aton Partido,” sigon ha CPI (Maoist). Dugang hini, ha kagrabihon han krisis ha nasud mas natikaklaro yana an panginahanglan nga pamunuan han Partido an pankabug-usan nga makaklase nga pakigbisog han masa nga Indian para ibagsak an paghahadi han mga imperyalista, dagko nga kumprador, ngan mga agaron maytuna.

Pagpapakita han determinasyon nga umabante han rebolusyunaryo nga kagiusan han India an pagselebrar hini ha ika-25 nga anibersaryo han PLGA hadton Disyembre 2. Ha Semana han Pagsalin-urog tikang Disyembre 2-8, ginlansar ha kagugub-an, kapatagan, ngan sentro nga urban, an mga miting han grupo ngan gudti nga katitirok. Nagpaskin ngan nanhatag an mga rebolusyunaryo han mga poster ngan polyeto para igpanawagan an pagpapakusog ngan pag-api ha PLGA. Ginlansar ini hin may mahugot nga paghihirot ngan pagpaprayoridad ha seguridad tungod ha ginpagrabe nga atake han estado.