Linagip ti pamilya, gagayyem, dagiti kakadwa, partido ken organisasyon iti nadumaduma a paset ti lubong ti maikatlo nga anibersaryo ti ipupusay ni Ka Jose Maria Sison idi Disyembre 16. Iti Pilipinas ken idiay the Netherlands, nairuswat dagiti aktibidad kas pananglagip ken Ka Joma.

Idiay the Netherlands, nairuar ti pelikula-dokumentaryo a My Friend the Terrorist idi Disyembre 13. Ti aktibidad ket inyuna ti Jose Maria Sison Legacy Foundation, Friends of the Filipino People in Struggle ken lokal nga organisasyon daytoy a Maya Solidarity.

Iti Pilipinas, insagut ti maysa a sangay ti Communist Party of the Philippines idiay Rizal ti insayangkat da a panagadal ti Basaran a Kurso ti Partido idi Disyembre 16.

Idiay Quezon City, pinadayawan dagiti balangay ti Artista at Manunulat ng Sambayanan ni Ka Joma iti inyuna daytoy a apagdarikmat a rali idiay University of the Philippines-Diliman idi Disyembre 17. Naiyaramid daytoy iti tengnga ti Lantern Parade, ti tinawen a parada dagiti parol iti kampus a daydaywen ti rinibo nga agbuybuya.

Malaksid ditoy, naitampok met iti rali ti umadani a maika-57 anibersaryo ti Partido iti Disyembre 26 ken ti panawagan iti umili a Pilipino, nangruna kadagiti kabataan, a makipaset iti gubat ti umili ken agkameng iti New People’s Army.