Limmatak daytoy napalabas a bulan ti nalawa a partisipasyon dagiti tao’t simbaan, lider-relihiyoso ken layko kadagiti demonstrasyon laban iti nakaro a korapsyon ti rehimen Marcos. Uray agtaltalinaed a konserbatibo ti Simbaan, ti timek ken takder daytoy ti maysa a napigsa a nakaawis iti rinibo a makipaset iti tignay ti umili kontra-korapsyon.

Iti tengnga daytoy ti rebolusyonaryo a pannakidangadang dagiti kameng ti Christians for National Liberation (CNL) a bugas ti dangadang ti umili dagiti Kristyano. Kabilang daytoy kadagiti inbinglay da Ka Lila ken Ka Mingol, agpada a baro a nabotosan nga upisyal ti CNL, iti pannakiuman ti Ang Bayan.

Dakkel ti impluwensya ti Simbaan ken dadduma pay a relihiyoso a grupo iti maysa a pagilyan kas ti Pilipinas a mayorya ket Katoliko, panangibingay ni Ka Mingol.

“Maibilbilang da a tagapagsarita ti hustisya ken kinapudno,” kunana. Nakaguyugoy kadagiti pamilya ken komunidad ti pannakipaset ti simbaan ken relihiyoso kadagiti tignay protesta gapu ta isuda ket pagrukodan ti kinausto, iti mata ti adu.

Segun met ken Ka Lila, maisursuro kadagiti tao’t simbaan ken relihiyoso ti panangisakit iti pada a tao, ti kinasinsero iti panagtulong iti tunggal maysa tapno agtignay para iti kinapudno nangruna iti sango ti nakaro a kinarigat ken didigra. “Saan a maaklon ti sistematiko a panagtakaw ti rekurso a rumbeng a maipapaay kadagiti kangrunaan a pagkasapulan,” kunana.

Ngem idi Nobyembre 30, limmatak ti agduduma a takder ti Simbaan iti panawagan ti umili. Nakita daytoy iti nagbalin a garaw ti Iglesia ni Cristo ken dagiti lider ti Catholic Bishop’s Conference of the Philippines. Kadagidiay a gundaway, immawag ti CNL a tumakder nga awan kompromiso ken agtignay basar iti hustisya ken rumuk-at manipud iti binnusor dagiti agar-ari a dasig ken dagiti pamilya nga agnumnumar iti burukrata-kapitalismo.

“Ti isyu ti korapsyon iti flood-control projects ket maysa a bassit a paset laeng ti nasaknap ken sistematiko a korapsyon ti reaksyunaryo a gubyerno,” segun ken Ka Lila. Saan laeng a seknan daytoy iti susik ti sumagmamano nu di ket seknan iti burukrata kapitalismo wenno panaggundaway a mapaspasamak iti panangipataray iti gubyerno kas negosyo, ti panagakup ti kinabaknang dagiti adda iti poder.”

“Burburaen ti CNL ti naratibo nga iti dua a kampo nga agrikrikyar laeng a rumbeng a magudwa ti panagtakder, gapu ta agpada a nasken nga agsungbat da Marcos Jr ken Sara Duterte karaman ti dadduma pay,” kuna met ni Ka Mingol.

Uray nagduduma ti ibagbaga dagiti lider-simbaan seknan iti korapsyon, segun ken Ka Lila, nalawag iti CNL ti nasaknap a pungtot ditoy ti masa a relihiyoso.

“Karit kadagiti lider ti simbaan nga agbalin a pagwadan ti panagpakumbaba ken dayalogo,” panangituloy ni Ka Mingol. Immawag met isuna kadagiti nababbaba a lider—dagiti obispo, padi, pastor, ministro ken dagiti lokal a lider—a saan nga agbalin a paspasurot laeng ti upisyal a linya, nangruna nu labsing daytoy kadagiti naadal da kanaig ti hustisya. “Isuda ket salaknib ti arban, saan a salaknib ti turay wenno kinaulimek iti sango ti kinadakes. Nasken a pandayen da ti konsensya ti kamkameng tapno makipaset da nga addaan pangngeddeng saan laeng a kas kameng ti bloke nu di ket kas bilang responsable nga indibidwal ti kagimongan.”

Kas iti napalabas, nagdakkel ti papel ti Simbaan iti panagorganisa ken panangriing iti umili para iti hustisya ken panagbalbaliw ti gimong, segun ken Ka Mingol. Napateg a saan nga agsardeng a papigsaen ti intar para iti demokratiko a rebolusyon ti umili. Kunana, determinado ti CNL a marimbawan ken maipagballigi ti dadakkel a karit ti konserbatismo, panangpreserba iti bagi para iti bukod nga interes ken ti Red-tagging tapno gun-oden ti baro a regta ti panagpalawa ti intar dagiti rebolusyonaryo a kadagiti tao a relihiyoso.

Ipakpakaawat ti CNL a tapno maiwaksi ti burukrata kapitalismo, kasapulan ti rebolusyonaryo a panagtignay. Maysa daytoy a mangririing ken mangpagkaykaysa iti rikna, nangruna iti nalawa nga intar ti relihiyoso a kabataan. Kakitaan isuda ti regta iti pannakipaset kadagiti tignay-protesta agingga iti armado a dangadang iti kaaw-awayan. Ikamkampanya ti CNL kadagiti tao’t simbaan ti rebolusyonaryo a programa ti National Democratic Front: maipakpakita nga adda ti alternatibo a sistema ti panangimaton nga agserserbi iti demokratiko nga interes ti masa.