Awan kapada ti pasista nga atake ti Operation Kagar ti reaksyunaryo nga estado ti India laban iti masa ken rebolusyonaryo a tignay nga Indian iti napalabas a dandani dua a tawen. Iti sango daytoy, agpingpinget ti Communist Party of India (Maoist), ti People’s Liberation Guerrilla Army (PLGA) ken intero a rebolusyonaryo a tignay nga Indian a paayen ti deklarado a panggep ti Kagar a gibusan ken atiwen ti panaglaban ti umili inton Marso 2026.

Manipud idi naipatungpal ti Operation Kagar idi Enero 2024, nabanwar a linabanan daytoy ti PLGA. Iti laksid ti nakadakdakkel a pwersa a pangdarup ken pangrebbek ti rehimen Modi, panagtaud dagiti kampo militar ken kampanya a likidasyon iti liderato ti Partido, nakaisayangkat kadagiti armado nga aksyon ti gerilya a hukbo.

Iti napalabas a tawen, dumanon iti 116 ti napatay ken 208 ti nasugatan iti pwersa ti pulis ken soldado kadagiti armado nga aksyon ti PLGA. Tinarget met daytoy dagiti napeklan nga impormer ti pulis ken militar ken dagiti kadakesan a lider ti Bharatiya Janata Party, agar-ari a partido iti India. Kangrunaan a nagaramat ti hukbo kadagiti pasabog kadagiti operasyon daytoy. Ken iti mano a gundaway, nagusar ti PLGA kadagiti katutubo nga armas kas kadagiti palab-og a pasok a tiniradan.

Nupay kasta, napudno nga ilanlanad ti CPI (Maoist) a nagsagaba daytoy ti nakakaro a pannakaatiw iti napalabas a tawen. Kuna daytoy, dagiti pannakaatiw ket bunga dagiti pang-uneg a pagkapuyan, pannakapaay nga ipatungpal dagiti plano ti Komite Sentral ken napapigsa nga atake ti estado.

Manipud Disyembre 2024 agingga Nobyembre tatta a tawen, dumanon iti 320 a rebolusyonaryo ti namartir nu sadinno a 117 ket babbai. Saan a bumaba iti 237 kadakwada ket kameng ti Partido. Walo ket kameng ti Komite Sentral, kabilang ti kabuklan a kalihim ti Partido a ni Kadwa Basavaraju, 15 ti kameng ti komite ti estado, 25 ti kameng ti distrito ken 73 ti kameng ti komite iti erya. Adda ti 13 manipud iti PLGA ken 33 a kadre ken aktibista ti organisasyon ti masa.

Tapno makabawi ti pigsa, immawag ti CPI (Maoist) a paingeten ti panaglaban iti Operation Kagar iti intero a pagilyan. Idurduron ti Partido a tudwen ken ilinteg dagiti nagkamalian iti napalabas a 22 bulan tapno malapdan ti ad-adda pay a pannakaatiw. Rumbeng met kano a pagadalan ken amirisen ti obhetibo a kasasaad ken suhetibo a pwersa iti tunggal erya tapno balbaliw a paregtaen ti Partido, makonsolida ti PLGA ken dagiti organisasyon ti masa.

Maysa kadagiti natudo ti Partido a kamali daytoy, nangruna iti gubat ti umili ket ti panagpaakikid iti bagbagi iti panangpabassit iti erya a tigtignayan. Kuna daytoy, rumbeng nga agtignay iti nalawlawa a saklaw ti hukbo ken saan nga agtalinaed a sentralisado. Partikular nga ehemplo daytoy ti pannakapaay nga umakar ti tropa ti PLGA manipud iti rehiyon a Dandakaranya, nga episentro ti Operation Kagar, agturong ti sabali a rehiyon.

Malaksid ditoy, inlanad met ti Partido ti pagkasapulan nga ibunannag, ilaksid ken supyaten dagiti traydor iti rebolusyon. Kalatakan kadagitoy a traydor da Sonu (Mallojula Venugopal Rao), dati a kameng ti Departamento iti Pulitika ti CPI (Maoist) ken Satish (Takkallapalli Vasudeva Rao) nga aktibo nga agpapausaren tatta iti rehimen Modi. Simmuko da idi Oktubre, ken nagawis da ti dadduma pay idi Nobyembre. Dumanon iti 299 indibidwal ti naguyod ti pangkat ken nagisuko da ti saan a bumaba iti 277 nga armas ti PLGA ken Partido.

“Iti daytoy a panawen, rebbengen tayo a warwaren ti buteng ken pannakariribuk iti intar tayo, agipakita ti kinatured ken papigsaen ti kumpyansa ti Partido tayo,” segun iti CPI (Maoist). Nayon daytoy, iti kinakaro ti krisis iti pagilyan ket ad-adda a lumawlawag tatta ti pagkasapulan nga idaulwan ti partido ti kabuklan a naindasigan a dangadang ti masa nga Indian tapno ibagsak ti panagari dagiti imperyalista, dadakkel a kumprador ken apo’t daga.

Ti panagrambak daytoy iti maika-25 anibersaryo PLGA idi Disyembre 2 ket panangipakita iti determinasyon nga umabante ti rebolusyonryo a tignay ti India. Iti Lawas ti Panagrambak manipud Disyembre 2-8, naisayangkat iti kabakiran, kapatagan ken sentro nga urban dagiti pulong ti grupo ken babassit a taripnong. Nagipaskil ken nagiwaras dagiti rebolusyonaryo kadagiti poster ken polyeto tapno iyawag ti panangpapigsa ken panagkameng iti PLGA. Naisayangkat daytoy iti nairut a panagannad ken panangiyuna iti seguridad gapu iti pinapigsa nga atake ti estado.