Nagurnong ti nasurok ti 20 kameng ti balangay ti Makabayang Samahang Pangkalusugan-National Capital Region (MSP-NCR) iti maysa a sikreto a lugar idi Disyembre 6 tapno isayangkat ti pangrehiyon nga asembliya da. Dimmar-ay ditoy dagiti mangmangged iti salun-at iti ospital, dagiti nars, duktor, medical technologist, dentista ken dagiti estudyante iti medisina ken kina-nars.

Ti asembilya ket inrana ti MSP-NCR iti pananglagip iti maika-47 anibersaryo manipud idi mabuangay daytoy idi Disyembre 6, 1978.

Iti taripnong, pinasingkedan ti MSP-NCR ti pangngeddeng para iti demokratiko a rebolusyon ti umili iti sango ti nalabes a panagsagaba ti umili a Pilipino. Kuna daytoy, napateg nga itipon ti pigsa ti sektor iti salun-at iti dangadang ti umili para iti panangiyabante ti rebolusyon.

Nabukel met iti asembliya ti 5-punto a resolusyon para iti panangpapigsa iti dangadang daytoy. Nairuar ti resolusyon iti naipablaak nga espesyal nga isyu ti pagiwarnak nga Ang Rebolusyonaryong Lunas.

Segun iti balangay, ti taripnong ket napateg nga okasyon para iti konsolidasyon ti kamkameng ti MSP. Nangted dalan daytoy tapno makaibinglay dagiti kameng ti rebolusyonaryo a kapadasan iti panagorganisa ken panangited serbisyo ti MSP a sumungbat iti awag nga agturong iti kaaw-awayan. Nayon daytoy, napateg met nga addang ti asembliya iti panagsagana iti ad-adda pay a konsolidasyon ti MSP iti nailyan a saklaw.