Nakikaykaysa dagiti Pilipino iti panagrambak iti maika-77 Internasyunal nga Aldaw ti Karbengan-tao idi Disyembre 10. Iti nadumaduma a paset ti pagilyan, rinibo ti nagmartsa tapno itandudo ti karbengan-tao ken babalawen ti rehimen Marcos iti awan sarday a panaglabsing daytoy iti karbengan ti umili.

Dagiti tignay ket inyuna ti Karapatan ken Bagong Alyansang Makabayan (Bayan) idiay Manila ken 15 syudad ken prubinsya. Nagiyebkas ti suporta ti International Coalition for Human Rights in the Philippines.

Idiay Manila, rinibo ti nakipaset iti taripnong ken programa idiay Liwasang Bonifacio ken iti martsa agturong Mendiola. Malaksid kadagiti organisasyon a nakabase idiay National Capital Region, nakikaykaysa iti protesta dagiti grupo manipud iti Southern Tagalog. Nagkaykaysa nga awag da ti: “Gibusan ti pasista, korap ken parigat a rehimen US-Marcos Jr!”

Idi Mayo 2025, pormal nga inpatungpal ti rehimen Marcos ti National Action Plan for Unity, Peace, and Development 2025-2028. Nagserbi daytoy a balangkas ti kakarwan a pangpulitika a represyon iti umili. Kangrunaan daytoy nga ipatpatungpal ti National Task Force-Elcac.

Iti listaan ti Karapatan, saan a bumaba iti 11 milyon Pilipino ti nagbalin a biktima ti panaglabsing iti karbengan-tao dagiti pwersa ti estado iti sidong ti rehimen Marcos. Kabilang kadakwada dagiti biktima ti ekstra-hudisyal a pammapatay, pwersado a panagpukaw, arbitraryo a panagaresto, pwersado wenno peke a panagpasuko, awan dirdireksyon a panagpalto-paltog ken panagbomba, pwersado a panagpanaw ken panagpangta, panagriribuk ken pammutbuteng kabilang ti Red-tagging.

Agtaltalinaed a nakabalud ti saan a bumaba iti 696 a balud pulitikal, nu sadinno a 163 ket naaresto iti sidong ni Marcos. Kadagiti balud pulitikal, 136 ti babbai, 93 ti nataenganen ken 89 ti masakit. Adda met nakabalud a 12 konsultant ken istap ti National Democratic Front of the Philippines para iti negosasyon iti kapya.

Iti panagleppas ti protesta idiay Mendiola, pinuoran dagiti grupo ti effigy da Marcos ken Sara Duterte kas ari ken reyna ti pasismo ken korapsyon. Inpakita ti effigy nga adda ti awit nga armalayt da Marcos ken Duterte bayat a nakatugaw da kadagiti maleta a simbolo ti korapsyon.

Kapada a protesta ken aktibidad ti naisayangkat idiay Baguio City, Tabuk City idiay Kalinga, Mountain Province, Laoag City idiay Ilocos Norte, Tarlac, Nueva Ecija, Bulacan, Legazpi City idiay Albay, Naga City idiay Camarines Sur, Iloilo City, Kalibo City idiay Aklan, Roxas City idiay Capiz, Bacolod City, Cebu City ken Davao City.

Panangitandudo ti simbaan ken mammanday-linteg iti karbengan-tao

Manipud pay iti panawen ti dati a rehimen Duterte, kadaraan ti rekord ti estado iti panaglabsing iti karbengan-tao idiay Mindanao. Kakarwan daytoy idi inyatnag ni Duterte ti linteg militar manipud Mayo 2017 agingga 2019.

Idi Disyembre 9-10, naisayangkat idiay Davao City ti Mindanao Human Rights Summit. Dinar-ayan daytoy ti 242 delegado manipud iti simbaan, kasta met dagiti abogado, salaknib ti karbengan-tao ken organisasyon masa ti Mindanao.

Iti maikadwa nga aldaw ti aktibidad, naiyaramid ti kabuklan nga asembliya ken panangisayangkat ti Pakighiusa sa Anawim-Mindanao (Panaw-Mindanaw). Ti baro a buangay a grupo ket maysa nga organisasyon nga addaan panggep nga ikkan boses ken hustisya dagiti biktima ti panaglabsing iti karbengan-tao idiay Mindanao.

Iti Konggreso, balbaliw a nairuswat ti Mambabatas para sa Karapatang Pantao wenno Makatao Coalition idi Disyembre 9. Panggep ti koalisyon nga itandudo dagiti linteg a mangsalaknib iti karbengan-tao. Umuna a binukel daytoy dagiti mammanday-linteg, kabilang ti Makabayan Bloc idi 2018 tapno supyaten dagiti ekstra-hudisyal a pammapatay idi ti rehimen Duterte. Madama nga idadauluan daytoy ni Rep. Leila de Lima.