Ad-adda a kimmaro daytoy napalabas a tawen 2025 ti krisis iti ekonomya ken pulitika ti agar-ari a sistema, ad-adda a kimmaro ti pannakibiang militar ti imperyalismo a US ken dimmakes ti kasasaad panggimong ti mayorya ti umili. Kagiddan daytoy, imminget dagiti dangadang laban iti korapsyon ken pasismo ti rehimen US-Marcos.

Kimmaro ti panagririkyar dagiti agar-ari a dasig, partikular ti rinnupak ti agkaribal a bunggoy ti Marcos ken Duterte. Inpila ti Konggreso idi Pebrero ti impeachment laban ken Sara Duterte, ngem naitantan ti kaso idi lapdan mismo ni Ferdinand Marcos Jr ti panagdengngeg iti Senado. Idi Marso, nakitinnulong ni Marcos iti Interpol iti panagaresto ken panangibalud iti sigud a presidente a ni Rodrigo Duterte idiay The Netherlands iti bileg ti mandamyento ti International Criminal Court. Idiay a masapit isuna kadagiti krimen iti sangkataw-an gapu iti nasaknap a pammapatay iti “war on drugs.”

Naangay idi Mayo ti eleksyon iti senado, konggreso ken lokal a gubyerno. Garapal ti sinasaur ken manipulasyon ti resulta. Inpakita daytoy ti risiris ken akomodasyon ti nadumaduma a bunggoy ti agar-ari a dasig, ken pannakibiang ti imperyalismo a US. Bayat nga agtaltalinaed a sibubukel ti suporta ti US ken Marcos, ipupwesto met daytoyen dagiti reserba a kabalyo na para iti panagtaray inton 2028.

Awan kapada ti pannakibiang militar ti US iti intero a tawen. Iti pannakikumplot iti rehimen Marcos ken panangusar iti Armed Forces of the Philippines (AFP), linuktan da dagiti baro a base ken pasilidad militar. Nagideposito ti US kadagiti nayon nga armas panggubat iti Pilipinas. Awan ressat a naiyaramid dagiti managprobokar nga ehersisyo militar iti uneg ken aglawlaw ti South China Sea, a pakadangran dagiti mangngalap a Pilipino.

Ad-adda nga imminget ti rinnupak dagiti agar-ari a dasig kalpasan a maibulgar dagiti dadakkel a kaso ti korapsyon kanaig dagiti naanomalya a flood control project ken kontrata kadagiti proyekto a pang-imprastruktura. Bimtak ti pungtot ti umili iti ginabsuon a kwarta nga ibulbulsa ni Marcos ken dagiti korap nga upisyal ti gubyerno.

Nagdalluyon iti intero a pagilyan ti nalawa a tignay protesta laban iti korapsyon ken burukrata kapitalismo. Iti unos ti dua a bulan manipud Setyembre, tuluy-tuloy dagiti walk-out ken rali dagiti estudyante iti nadumaduma a kampus. Nabukel ti nalalapad nga alyansa dagiti pwersa a kontra-korapsyon iti nadumaduma a sektor ken lugar, uray pay adda ti sumagmamano a pwersa a mangiyad-adayo iti pungtot ti umili ken Marcos.

Iti tengnga ti gandat a kaluban ti papel ti Malacañang kadagiti anomalya babaen ti pabuya nga “imbestigasyon,” inbunannag dagiti karaman iti korapsyon a mismo a ni Marcos ti utek ken nagawat ti kadakkelan a kikbak iti ginasut a bilyon a piso a proyekto a pang-imprastruktura. Saan a nagbayag, immaweng ti pukkaw para iti panagibbat wenno panagpadisi ken Marcos ken Duterte.

Ti tignay laban iti korapsyon ket bimtak iti tengnga ti agtultuloy a panaguneg ti krisis iti ekonomya, panagsuwek ti kasasaad ti nalawa a masa ti umili, ken agsusumbangir a programa ken addang ti rehimen Marcos a parigat iti umili.

Nasaknap ti disgusto ti umili iti sango ti nababa a sweldo ti mangmangged, kinaawan trabaho, gistay linawas a panagngato ti presyo ng langis, nangato a singir iti palpak a serbisyo iti danum, kuryente ken transportasyon, jeepney phaseout, pribatisasyon dagiti palengke, managdadael iti kalikasan ken pagbiagan a reklamasyon iti baybay, panagkamkam iti daga, panagpadisi kadagiti mannalon ken dadduma pay a parigat. Ubbaw ti makunkuna a talinaay iti tengnga ti nakaro a panagipawil ken panagparigat iti umili.

Nasaknap ti awag para iti ₱1,200 nga inaldaw a minimum a sweldo. Limmatak ti mano a welga dagiti mangmangged ken tignay ti nadumaduma a sektor iti nadumaduma a lugar tapno ilaban ti pagimbagan da. Lumawlawa ken umad-adu ti tumaktakder laban iti pasista a represyon ti rehimen Marcos. Adu ti nariing iti panagiparang dagiti progresibo a partido iti nailyan demokratiko a programa iti pannakipaset da iti eleksyon. Ti panagpinget iti panagorganisa ken panagpatignay iti masa ket sigurado nga agurnong ken agbwelo kadagiti sumaruno a panawen.

Iti sango ti nauneg a krisis ken nainget a dangadang, ken bunga ti tignay panagilinteg, tuluy-tuloy a makapappapigsa ti Partido ken dagiti rebolusyonaryo a pwersa. Tuluy-tuloy a maingatngato ti tukad ti teorya ken praktika babaen ti tignay panagadal. Pinasaknap ti Partido ti panagadal iti burukrata kapitalismo kas tarabay iti panagawat ti umili iti limmatak a pakaseknan ti korapsyon.

Mapappapigsa dagiti limed a rebolusyonaryo nga organisasyon ti masa a mangmangged, mannalon, kabataan, manursuro, artista, siyentista, duktor, nars ken mangmangged iti salun-at, tao’t simbaan, dagiti migrante a Pilipino ken dadduma pay a sektor. Bayat nga agproppropaganda para iti demokratiko a rebolusyon ti umili, umad-adu ti agdesdesisyon a makipaset iti armado a dangadang ken rebolusyonaryo a tignay ti mannalon iti kaaw-awayan.

Iti kaaw-awayan, tuloy-tuloy nga umab-abante dagiti dangadang ti mannalon iti panangsalaknib iti daga ken pagbiagan da laban kadagiti managkamkam, laban kadagiti parigat a patakaran ti rehimen Marcos ken pasista a represyon dagiti armado a gamat daytoy. Nalatak dagiti barikada ken dadduma a langa ti tignay iti mano a lugar. Mapappapigsa dagiti sangay ken komite ti Partido, mabukbukel dagiti rebolusyonaryo a timpuyog masa dagiti mannalon, kabataan ken babbai, dagiti yunit milisya ken yunit pangdepensa-iti-bagi, bayat nga agpingpinget dagiti yunit ti New People’s Army iti gawaing masa ken pannakigubat a gerilya.

Iti panangidaulo ken kabinnadang ti Partido, agtultuloy ti NPA iti panagpalawa ken panagpauneg ti base a masa ti mannalon. Awit da ti nalawa a suporta daytoy, kaadwan a yunit ti NPA ket nakapagpreserba ti pigsa iti panagsango kadagiti awan-ressat nga operasyon kombat ti AFP. Umad-adu dagiti balligi iti aktibo a panagdepensa, taktikal nga opensiba ken panagdusa kadagiti napeklan a traydor ken pasista. Tuluy-tuloy ti panagrekrut ken panagsanay dagiti Nalabbaga a mannakigubat ken kumander.

Iti sango ti kumarkaro a krisis ti agar-ari a sistema, ken iti pundasyon ti tignay panagilinteg, nakatannawag ti Partido iti ad-adda pay a panagpapigsa ken panagabante ti demokratiko a rebolusyon ti umili kadagiti umay a tawen. Determinado ti Partido nga idauluan ti nalawa a masa iti panangiyabante ti gubat ti umili ken pananggun-od kadagiti balligi iti intero a pagilyan.