Nagdeklara ti uppat nga aldaw a ceasefire ti Communist Party of the Philippines (CPP) kas pannakikaykaysa kadagiti tradisyunal a panagrambak ti masa a Pilipino. Inatasan ti Komite Sentral ti Partido ti New People’s Army (NPA) nga ipatungpal daytoy manipud 00:00 ti bigat ti Disyembre 25 agingga 23:59 ti rabii ti Disyembre 26 ken manipud 00:00 ti bigat ti Disyembre 31 agingga 23:59 ti rabii ti Enero 1, 2026.

Segun iti liderato ti Partido, ti ceasefire ket panangted-dalan kadagiti simple a panagrambak dagiti Pilipino iti sango ti nakaro a kasasaad iti gimong ken ekonomya iti sidong ti rehimen Marcos. Gundaway met daytoy ti rebolusyonaryo a tignay, kadwa ti umili tapno rambakan ti maika-57 anibersaryo ti Partido inton Disyembre 26.

Iti panangipatungpal ti ceasefire, inatasan ti Komite Sentral dagiti yunit ti NPA nga ag-aktibo a depensa nangruna iti sango ti awan-sarday nga operasyon kombat ti Armed Forces of the Philippines (AFP). Rumbeng kano a nairut a makitinnulong dagiti yunit ti NPA iti masa tapno ipatungpal daytoy. “Rumbeng met a kanayon da a nakasagana nga agmaniobra wenno agisayangkat ti kontra-atake iti panawen a kasapulan ti kasasaad,” segun iti Komite Sentral.

Dagus a kinontra ti AFP ken Department of National Defense ti bangbangir a ceasefire ti Partido ken hukbo ti umili. Segun iti Partido, daytoy a pablaak dagiti tauhan ti rehimen Marcos ket mangipanpaneknek iti uwaw-ti-dara a galad ti armado a pwersa na ken balak na a riribuken dagiti natalinaay a panagrambak ti masa a Pilipino.

“Awan sabali a kayat nga iregalo ni Marcos iti umili kadagiti umay a tradisyunal a panagrambak nu saan a bala ken bomba iti panangmandar na iti AFP ken kadagiti pulis nga agisayangkat ti awan sarday nga operasyon kombat iti kaaw-awayan,” segun ken Marco Valbuena, upisyal iti impormasyon ti Partido.

Kabayatanna, binatikos ti Partido ti inpasaknap ti Philippine Army a panaglabsing ti NPA iti ceasefire iti labanan a napasamak idiay Northern Samar idi Disyembre 15, idinto a saan pay daytoy a saklaw ti deklarasyon.