Idi Enero 21, induron ti Department of Information and Communications Technology (DICT) ti maysa a gakat a patakaran tapno aramiden a rekisito ti panagparehistro dagiti Pilipino iti pananglukat ti akawnt iti sadinno man a plataporma ti social media. Iti sidong ti gakat, aramiden a rekisito ti panangited ti pudno a nagan ken ti dadduma pay a datos tapno mausar ti bukod nga akawnt. Para kadagiti edad 18 agpababa, kasapulan ti nagannak para iti beripikasyon.

Maobligar met dagiti plataporma nga agipatungpal ti nairut a beripikasyon iti pannakabigbig, karaman ti panangala ti ladawan ti rupa dagiti agar-aramat ditoy. Daytoy kano ket tapno labanan dagiti krimen iti online kas kadagiti scam, panagtakaw ti identidad ken sekswal a panagabuso ken panaggundaway kadagiti ubbing. Ti nasao a polisiya ket madaman a maipatpatungpal idiay European Union ken maidurduron a maipatungpal iti intero a Southeast Asia. Umuna nga inlungalong ni Sen.Panfilo Lacson ti kapada a polisiya idi Hulyo 2025.

Segun kadagiti grupo nga Agham ken Computer Professionals’ Union, numan pay lehitimo dagiti isyu a dinakamat ti DICT, lablabsingen ti polisiya ti pribasiya dagiti agar-aramat ti social media. Ipaspasa ti ahensya ti responsibilidad iti panangpunas kadagiti krimen iti online iti ordinaryo a Pilipino imbes a pagsungbaten dagiti kumpanya nga agtagikua kadagiti social media platform. Ar-aramiden na met daytoy a normal ti sarbeylans ken panagkulekta ti pribado nga impormasyon dagiti indibidwal.

Nalawag a paset daytoy ti kumarkaro a sarbeylans, sensura ken represyon ti rehimen US-Marcos iti karbengan iti nawaya a panagiyebkas ken panagipablaak ti umili. Awan ti nagdumaan daytoy kadagiti siguden a palpak a linteg kas ti SIM Registration Law ken Cybercrime Prevention Act a nangikabil kadagiti sensitibo a datos ti umili iti ima ti represibo nga ahensya ti estado ken pribado a kumpanya. Saan daytoy a narisut dagiti krimen iti online, nga agtultuloy ken ad-adda pay a kimmaro.

Panagaramat iti social media para iti pasismo

Idi Disyembre 2025 ken Enero iti agdama a tawen, nagbalin a nakadkadlaw ti panagadu dagiti komento iti social media nga aglalaon ti pungtot ti umili laban iti korapsyon ken pasismo ti rehimen US-Marcos. Iti nakaro nga unget ken pannakaupay, adu ti nagiyebkas ti kinausto ti armado a panaglaban nga iyab-abante ti Communist Party of the Philippines ken New People’s Army. Nairana ti panagadu dagiti komento iti anibersaryo ti Partido, nu kaano nga adda dagiti paskil ti pablaak, litrato ken bidyo kanaig iti panagrambak. Kaadwan kadagiti komento ket panagiyebkas ti pannakadismaya iti agraraira a bulok a sistema ken panagkalikagum iti rebolusyon tapno mabaliwan ti bulok a pannagna iti pagilyan.

Tapno lapdan ti panagbwelo dagiti komento, pinangtaan ti Armed Forces of the Philippines (AFP) dagiti nagipablaak ti arungaing da ken inakusaran a “mangsugsugsog nga agalsa laban iti gubyerno.” Tinagibassit ti NTF-Elcac dagiti arungaing kas “propaganda” ken parparwaren da a maysa laeng daytoy a “nasaknap a kampanya iti social media” ti Partido. Gapu iti amak ti ahensya ken ti AFP iti lumawlawa a disgusto ti umili iti rehimen Marcos, nagisayangkat daytoy ti kampanya a “darup” babaen iti ahensya a pang-“PR” (public relations) ken dagiti mabaybayadan a troll. Kabilang iti pinatignay ti NTF-Elcac ti mano pulo a ribo a soldado ti AFP tapno lemmesen iti pananglais ti siasinoman nga addaan komento a kritikal wenno mangdildillaw iti rehimen ken nangruna laban iti panagabuso ti militar. Sipaparang met a ginabburan da ti fake news dagiti damag seknan iti panaglabsing ken konkontrolen da ti opinyon ti publiko babaen ti sensura iti midya.

Nakabalangkas iti NAP-UPD

Ti online a kampanya a darup, panaginget ti sarbeylans, panangtarget kadagiti kritiko ti estado ken dagiti gakat a linteg para ditoy ket nakapauneg iti balangkas ti National Action Plan for Unity, Peace, and Development (NAP-UPD). Iti sidong ti Strategic Communication Cluster daytoy, kalikagum ti NTF-Elcac a lapdan ken kontrolen dagiti pagayusan ti impormasyon, pawilan ti rekrutment ken kontraen ti “propaganda” ti rebolusyonaryo a tignay iti uneg ken ruar ti pagilyan babaen ti panangipasaknap ti disimpormasyon, saywar ken Red-tagging. Ipaspasaknap ti ahensya ti kapanunotan nga amin a panagbatikos iti korapsyon ken represyon ket paset ti propaganda ti rebolusyonaryo a tignay, bayat a dagiti protesta dagiti kabataan laban iti korapsyon ket “terror grooming” tapno ikalintegan ti panangipawil iti demokratiko a karbengan para iti nawaya a panagiyebkas ken panagorganisa.

Nu mailusot ti pwersaan a rehistrasyon iti social media, saan laeng a manayunan ti makulkulekta a pribado nga impormasyon ken dagiti pannirigan, ad-adda pay daytoy nga maaramid a sistematiko ti nasaknap a sarbeylans ti estado. Kas kadagiti immuna a linteg, sigurado nga agbalin a palpak ti linteg iti panggep a risuten ti online a krimen. Kas ti immuna a pwersaan a panagparehistro ti SIM Card, sigurado met a minilyon a Pilipino ti maawanan ti akses iti napapateg a serbisyo iti komunikasyon ken mapaidaman ti boses. Agbalin a nalaklaka para iti estado a kontrolen ti opinyon ken damag ken puntiryaen dagiti kritiko.