Sadtong Enero 21, ginduso sang Department of Information and Communications Technology (DICT) ang isa ka hagna nga patakaran agud himuon nga rekisito ang pagparehistro sang mga Pilipino sa pagbukas sang akawnt ano man nga plataporma sang social media. Sa idalum sang hagna, himuon nga rekisito ang paghatag sang matuod nga ngalan kag iban pa nga datos agud magamit ang kaugalingon nga akawnt. Para sa mga edad 18 panubo, kinahanglan ang mga ginikanan para sa beripikasyon.

Obligado man ang mga platform nga may hugot nga beripikasyon sa pagkilala, lakip ang pagkuha sang litrato sang nawong sang mga nagagamit sini. Ini kuno agud awayon ang mga krimen online kaangay sang mga scam, pagpangawat sang identidad, kag sekswal nga pagpang-abuso kag paghimulos sa mga bata. Ang amo nga polisiya sa subong ginapatuman na sa European Union kag ginaduso nga mapatuman sa bug-os nga Southeast Asia. Una nga ginproponer ni Sen.Panfilo Lacson ang pareho nga polisiya sadtong Hulyo 2025.

Suno sa mga grupong Agham kag Computer Professionals’ Union, bisan lehitimo ang mga isyu nga ginasambit sang DICT, lubos nga ginalapas sang polisiya ang pribasiya sang mga nagagamit sang social media. Ginapasa sang ahensya ang responsibilidad sa pagdugmok sa mga krimen online sa ordinaryo nga Pilipino imbes nga pasabton ang mga kumpaniya nga tag-iya sang mga social media platform. Ginahimo man sini nga normal ang surbeylans kag pagpang-kolekta sang pribado nga impormasyon sang mga indibidwal.

Maathag nga kabahin ini sang nagasingki nga surbeylans, sensura kag pagsumpo sang rehimen US-Marcos sang kinamatarung sa hilway nga pagpahayag kag pabantala sang pumuluyo. Wala ini sang kinalain sa sadto palpak nga mga layi kaangay sang SIM Registration Law kag Cybercrime Prevention Act nga nagabutang sa mga sensitibo nga datos sang pumuluyo sa kamot sang mapang-ipit nga ahensya sang estado kag pribado nga kumpaniya. Wala sini natapna ang mga krimen online, nga nagapadayon kag mas pa nga nag-grabe.

Paggamit sa social media para sa pasismo

Sadtong Disyembre 2025 kag Enero sa subong nga tuig, nangin talalupangdon ang pagdamo sang mga komento sa social media nga naga-unod sang kaakig sang pumuluyo batuk sa korapsyon kag pasismo sang rehimen US-Marcos. Sa grabe nga kaakig kag pagkadismaya, madamo ang nagpahayag sang kahustohon sang armadong pakig-away nga ginasulong sang Partido Komunista sang Pilipinas kag Bagong Hukbong Bayan. Nagsanto ang pagdamo sang mga komento sa anibersaryo sang Partido, kon diin may mga pagtapik sang pahayag, litrato kag bidyo tuhoy sa pagsaulog. Kadam-an sa mga komento pagpahayag sang ila pagkadismaya sa nagaluntad nga dunot nga sistema kag handum sang rebolusyon agud mabag-o ang dunot nga nakaugalian sa pungsod.

Agud tapnaon ang pagbuylo sang mga komento, ginpahog sang Armed Forces of the Philippines (AFP) ang mga nagpahayag sang ila mga reklamo kag ginpasibangdan nga “nagatulod nga mag-alsa batuk sa gobyerno.” Ginpagamay sang NTF-Elcac ang mga reklamo bilang “propaganda” kag ginapaguwa nga isa lang ini ka “lapnagon nga kampanya sa social media” sang Partido. Tungod sa kahadlok sang ahensya kag sang AFP sa nagalapad nga disgusto sang pumuluyo sa rehimen Marcos, naglunsar ini sang kampanyang “dumog” gamit ang ahensyang pang-“PR” (public relations) kag mga bayaran nga troll. Lakip sa ginpahulag sang NTF-Elcac ang puluan ka libo nga soldado sang AFP agud lunuron sa pagpangsuya ukon pagpanglibak ang sin-o man nga may komento nga kritikal ukon pagsaway sa rehimen kag ilabi na batuk sa pagpang-abuso sang militar. Hayagan man nila nga ginatabunan sang fake news ang mga balita tuhoy sa paglapas sa tawhanon nga kinamatarung kag ginakontrol ang opinyon publiko paagi sa sensura sa midya.

Yara sa balayon sang NAP-UPD

Ang online nga kampanyang dumog, pagsingki sang surbeylans, pagtarget sa mga kritiko sang estado kag mga hagna nga layi para diri nakapaidalum sa balayon sang National Action Plan for Unity, Peace, and Development (NAP-UPD). Sa idalum sang Strategic Communication Cluster sini, luyag sang NTF-Elcac nga punggan kag kontrolon ang mga alagyan sang impormasyon, punggan ang rekrutment kag kontrahon ang “propaganda” sang rebolusyonaryong kahublagan sa sulod kag guwa sang pungsod paagi sa pagpalapta sang disimpormasyon, saywar kag Red-tagging. Ginapalapnag sang ahensya ang panghuna-huna nga tanan nga pagbatikos sa korapsyon kag pagpang-ipit kabahin sang propaganda sang rebolusyonaryong kahublagan, samtang ang mga protesta sang mga pamatan-on batuk sa korapsyon “terror grooming” agud hatagan rason ang pagsumpo sa demokratikong kinamatarung para sa hilway nga pagpahayag kag pag-organisa.

Kon mapalusot ang pwersa nga rehistrasyon sa social media, indi lang madugangan ang mga nakulekta nga pribado nga impormasyon kag mga panglantawan, labi pa sini nga himuon nga sistematiko ang lapnagon nga surbeylans sang estado. Kaangay sang una nga mga layi, pat-od nga mangin palpak ang layi sa katuyuan nga tapnaon ang online nga krimen. Kasubong sang nauna nga pwersa nga pagparehistro sang SIM Card, segurado man nga minilyon ka Pilipino ang mawad-an sang akses sa malahalon nga serbisyo sa komunikasyon kag madingutan sang boses. Mangin mas mahapos para sa estado nga kontrolon ang opinyon kag balita, kag pagtarget sini sa mga kritiko.