Hadton Enero 21, ginduso han Department of Information and Communications Technology (DICT) an usa nga ginproponer nga palisiya agud himuon nga rekisito an pagpaparehistro han mga Pilipino ha pag-aabre han akawnt diinman nga plataporma han social media. Ilarum han proposisyon, hihimuon nga rekisito an paghatag han tinuod nga ngaran ngan iba pa nga datos para magamit an kalugaringon nga akawnt. Para ha mga edad 18 tipaubos, kinahanglan an kag-anak para ha beripikasyon.

Oobligahon liwat an mga platform nga magkamayda hin mahugot nga beripikasyon ha identidad, kalakip an pagkuha han ritrato han nawong han mga nagamit hini. Ini kuno agud atuhan an mga krimen online sugad han mga scam, pangawat han identidad, ngan sekswal nga pangabuso ngan paniniyupi ha mga bata. An nasering nga palisiya ginhihimo na yana ha European Union ngan ginduduso nga mahipatuman ha bug-os nga Southeast Asia. Syahan nga ginproponer ni Sen. Panfilo Lacson an pareho nga palisiya hadton Hulyo 2025.

Sigon ha mga grupo nga Agham ngan Computer Professionals’ Union, bisan kun lehitimo an mga isyu nga ginsering han DICT, direkta nga gintatalapas han palisiya an pribasiya han mga nagamit han social media. Ginpapasa han ahensya an responsabilidad ha pagpuo han mga krimen online ha ordinaryo nga Pilipino imbes nga papagbatunon an mga kompaniya nga nananag-iya han mga social media platform. Ginhihimo liwat hini nga normal an sarbeylans ngan pangolekta han pribado nga impormasyon han mga indibidwal.

Klaro nga kaparte ini han tikagrabe nga sarbeylans, sensura ngan pagpuypoy han rehimen US-Marcos ha katungod ha libre nga pagpapahayag ngan pamamahayag han katawhan. Waray ini ginkaiba ha hadto na palpak nga mga balaud sugad han SIM Registration Law ngan Cybercrime Prevention Act nga nagbutang ha mga sensitibo nga datos han katawhan ha kamot han mapanmuypoy nga ahensya han estado ngan pribado nga kompaniya. Waray hini mapuo an mga krimen online, nga nagpapadayon ngan mas naggrabe pa.

Paggamit ha social media para ha pasismo

Hadton Disyembre 2025 ngan Enero ha presente nga tuig, nagin landaw an pagdamo han mga komento ha social media nga nag-uunod han kangalas han katawhan kontra ha korapsyon ngan pasismo han rehimen US-Marcos. Ha sobra nga kangalas ngan pananalumpigos, damo an nagpahayag han katukmaan han armado nga pag-ato nga ginpapasulong han Partido Komunista ng Pilipinas ngan Bagong Hukbong Bayan. Nahituman an pagdamo han mga komento ha anibersaryo han Partido, kun kan-o nga mayda mga gin-gawas nga pahayag, ritrato ngan bidyo hiunong ha selebrasyon. Kadam-an ha mga komento pagpapahayag han ira pagkadismaya ha naeksister nga dunot nga sistema ngan karuyagon han rebolusyon agud mabag-o an dunot nga kaayusan han nasud.

Agud pugngan an pagbuylo han mga komento, gintarhug han Armed Forces of the Philippines (AFP) an mga nagpahayag han ira araba ngan gin-akusaran nga “nagsusulsol nga mag-alsa kontra ha gubyerno.” Ginmenos han NTF-Elcac an mga araba komo “propaganda” ngan ginpapagawas nga usa la ini nga “hiluagan nga kampanya ha social media” han Partido. Tungod ha kahadlok han ahensya ngan han AFP ha natikahiluag nga disgusto han katawhan ha rehimen Marcos, naglansar ini hin kampanya nga “dumog” gamit an ahensya nga pan-“PR” (public relations) ngan mga binaydan nga troll. Kalakip ha ginpagios han NTF-Elcac an pira kayukot nga sundalo han AFP agud lumuson ha biay-biay o panginsulto an hin-o man nga mayda komento nga kritikal o nagsususon ha rehimen ngan labina kontra ha pangabuso ng militar. Butaray liwat hini nga gintahuban hin fake news an mga balita hiunong ha pagtalapas ha tawhanon nga katungod ngan ginkokontrol an pampubliko nga opinyon pinaagi han sensura ha midya.

Nakabalayan ha NAP-UPD

An online nga kampanya nga dumog, paggrabe han sarbeylans, pagtarget ha mga kritiko han estado ngan mga ginpoproponer nga balaud para dinhi nakapailarum ha balayan han National Action Plan for Unity, Peace, and Development (NAP-UPD). Ilarum han Strategic Communication Cluster hini, karuyag han NTF-Elcac nga pugngan ngan kontrolon an mga aragian han impormasyon, pugngan an rekrutment ngan kontrahon an “propaganda” han rebolusyunaryo nga kagiusan ha sakob ngan gawas han nasud pinaagi han pagpapasamwak han disimpormasyon, saywar ngan Red-tagging. Ginpapasawamk han ahensya an panhunahuna nga ngatanan nga pagsukna ha korapsyon ngan panmuypoy kaparte han propaganda han rebolusyunaryo nga kagiusan, samtang an mga protesta han mga kabatan-unan kontra ha korapsyon “terror grooming” agud tagan rason an pagpuypoy ha demokratiko nga katungod para ha kalibrihan ha pagpapahayag ngan pag-oorganisa.

Ingkaso mahilusot an pwersahay nga rehistrasyon ha social media, diri la madudugngan an nakokolekta nga pribado nga impormasyon ngan mga panan-aw, mas hihimuon pa hini nga sistematiko an hiluagan nga sarbeylans han estado. Sugad han nahiuna nga mga balaud, piho nga magigin palpak an balaud ha tuyo nga puuhon an online nga krimen. Sugad han nauna nga pwersahay nga pagpaparehistro han SIM Card, segurado liwat nga milyun-milyon nga Pilipino an mawawarayan hin akses ha importante nga serbisyo ha komunikasyon ngan mahihikawan han boses. Magigin mas masayon para ha estado nga kontrolon an opinyon ngan balita, ngan pagtarget hini ha mga kritiko.