Igin-anunsyo han Kilusang Bayan Kontra Kurakot (KBKK) hadton Enero 19 nga utro ini nga maglalansar hin hiluagan nga protesta kontra-korapsyon ha Pebrero 25, kadungan han paghandum ha ika-40 nga anibersaryo han pag-aalsa nga EDSA People Power. An grupo an nanguna ha 100,000 katawo nga demonstrasyon hadton Septyembre 21, 2025 ngan 20,000 katawo nga gios protesta hadton Nobyembre 30, 2025 kontra ha korapsyon ha Luneta Park, Manila.

Ha anunsyo han KBKK, kaupod hini an magkalain-lain nga mga sektor ngan grupo nga aktibo nga napartisipar ha kagiusan kontra-korapsyon ha nasud. Kalakip dinhi an Bagong Alyansang Makabayan (Bayan), grupo ngan konseho han mga kabatan-unan nga estudyante nga nanguna ha dagko nga walk-out hadton urhi nga parte han 2025, mga trabahador ngan kablas ha syudad, kababayin-an, mga magturutdo, trabahador pankalibsugan, kalagsan ngan iba pa.

Sering nira, ha luyo han nagin dirudiretso nga pagdemanda han mga grupo ngan publiko ha rehimen Marcos pipira pala an napapagbaton ngan waray pa nga mga napipriso nga “big fish” o dako nga dabi ha korapsyon. Ginsukna liwat nira an pagpapadagmit han rehimen ha pagsabalaud ha nasyunal nga badyet para ha 2026 nga ha esensya putos pa gihap han pork barrel ngan iba pa nga insertion. Dugang hini, dako nga basaranan liwat han paggios nira an pagbasura han komite ha Kongreso ha reklamo nga impeachment kontra kan Marcos.

Pambubusal ngan panmuypoy. Ginkundenar gihap han KBKK an pambubusal ngan panmuypoy han rehimen Marcos ha mga natindog kontra-korapsyon. Diri mamenos ha 72 nga indibidwal an ginsalawdan han reklamo han Philippine National Police (PNP) ha Department of Justice (DOJ) para ha sedisyon ngan pagsulsol han sedisyon nga mayda kalabutan ha Anti-Crime Prevention Act of 2012.

Kaupod ha mga iginreklamo han PNP ha DOJ hi Renato Reyes Jr, tagapangulo han Bayan, ngan mga lider-estudyante tikang ha mga konseho, mantalaan ngan progresibo nga grupo nga hira Tiffany Faith Brillante, Joaquin Buenaflor, Jacob Baluyot, ngan Aldrin Kitsune. Gintarget an mga iginreklamo tungod ha partisipasyon ha protesta nga Baha ha Luneta hadton Septyembre 21, 2025 ngan pag-post ha social media han ira mga panindugan kontra-korapsyon.

Naglansar han mga protesta an mga progresibo nga grupo kontra ha pan-gigipit han PNP ngan rehimen Marcos. Nanawagan hira nga dagmit nga igbasura an mga reklamo. Igin-insister nira nga an mga kurakot ha gubyerno an angay lanaton ngan prisuhon, diri an mga naato ha korapsyon.